საპრეზიდენტო არჩევნების კანდიდატებმა ეთიკის პრინციპების დოკუმენტს მოაწერეს ხელი, რომელიც მათ წინასაარჩევნო პროცესის ეთიკურად წარმართვას ავალდებულებს. ცენტრალური საარჩევნო კომისიის ინფორმაციით, დოკუმენტის ხელმომწერი ოცამდე კანდიდატია.

როგორც საარჩევნო ადმინისტრაციაში განაცხადეს ამ ეტაპზე ხელმომწერებს შორის არ არიან მმართველი პარტიის მხარდაჭერილი კანდიდატი, სალომე ზურაბიშვილი და გაერთიანებული ოპოზიციის კანდიდატი, გრიგოლ ვაშაძე. მათივე თქმით, კანდიდატებისგან არსებობს მზაობა და უახლოეს მომავალში დოკუმენტს სხვებიც მოაწერენ ხელს.

დოკუმენტის მიხედვით, კანდიდატები თანხმდებიან, რომ საქმიანობას აწარმოებენ ეთნიკური, რელიგიური, გენდერული თუ სხვა ნიშნით დისკრიმინაციის გარეშე და არ გამოიყენებენ სიძულვილის ენას, ქსენოფობიურ ან მუქარის შემცველ გამონათქვამებს. ასევე ხელს შეუწყობენ მშვიდობიან საარჩევნო გარემოს, ხელს არ შეუშლიან კონკურენტების წინასაარჩევნო კამპანიის ღონისძიებებსა და სააგიტაციო მასალის გავრცელებას. განზრახ არ გაავრცელებენ ყალბ ინფორმაციას სხვა კანდიდატების შესახებ და არ გამოიყენებენ ადმინისტრაციულ რესურსებს.

ცესკოს განცხადებით, დოკუმენტის მომზადების პროცესში თავად კანდიდატებიც იყვნენ ჩართული. არჩევნებისთვის 25 კანდიდატია დარეგისტრირებული.