საქართველოს ახალგაზრდა იურისტთა ასოციაციას მიაჩნია, რომ კომუნიკაციების ეროვნული კომისიის მოთხოვნა, ამოიღონ ტელევიზიებისგან მმართველი პარტიის მიერ მხარდაჭერილი საპრეზიდენტო კანდიდატის, სალომე ზურაბიშვილის საწინააღმდეგო სამი წინასაარჩევნო ვიდეო, უკანონოა. საია მიიჩნევს, რომ კომუნიკაციების კომისიის თავმჯდომარის წერილი საქართველოს კანონმდებლობას ეწინააღმდეგება და გამოხატვის თავისუფლების შეზღუდვის საფრთხეებსაც შეიცავს.

"აღნიშნული დოკუმენტი (წერილი) არ არის კომისიის სამართლებრივი აქტი და შესაბამისად, არ არის მაუწყებლების მხრიდან სავალდებულოდ შესასრულებელი", — წერია საიას განცხადებაში.

არასამთავრობოს განცხადებით, მაუწყებლობის შესახებ საქართველოს კანონის მიხედვით, კომისიის სამართლებრივ აქტებს განეკუთვნება კომისიის დადგენილება, გადაწყვეტილება და კომისიის თავმჯდომარის ბრძანება. იმის გათვალისწინებით, რომ დოკუმენტი ქცევის ზოგად წესს შეიცავს, კანონმდებლობის მიხედვით, თავმჯდომარის ბრძანება ვერ იქნება.

"შესაბამისად, აღნიშნულ საკითხზე უნდა ემსჯელა კომისიას.., თუმცა ამ საკითხზე კომისიას სხდომაზე არ უმსჯელია", — ვკითხულობთ საიას განცხადებაში.

საია მიიჩნევს, რომ წერილი საქართველოს კანონმდებლობასთან წინააღმდეგობაში იმის გამოც მოდის, რომ თუ რეკლამით გარკვეული პირის უფლებებია დარღვეული, მას შეუძლია იმოქმედოს არა მაუწყებლის, არამედ რეკლამის დამკვეთის წინააღმდეგ.

"მოვუწოდებთ საქართველოს კომუნიკაციების ეროვნულ კომისიას, პატივი სცეს გამოხატვის თავისუფლებას, იმოქმედოს კანონმდებლობით დადგენილი წესით და არ გასცდეს მის უფლებამოსილებას", — აცხადებს საია.

ტელეკომპანიებმა კომუნიკაციების კომისიის თავმჯდომარისგან, კახა ბექაურისგან სალომე ზურაბიშვილის ანტირეკლამების დაუყოვნებლივ ამოღების შესახებ წერილი 25 სექტემბერს მიიღეს. წერილით ირკვევა, რომ კომისიამ შეაფასა პოლიტიკური რეკლამის შინაარსი და ის "არაეთიკურად", "ზნეობრივი ნორმების შემბღალავად" და "უხამსობის" შემცველად მიიჩნია.

ამავე თემაზე: