რუსული თვითმფრინავი IL-20, რომელიც 17 სექტემბერს ხმელთაშუა ზღვის თავზე გაქრა, სირიის ანტისაჰაერო თავდაცვამ ჩამოაგდო. ამის შესახებ ინფორმაცია რუსეთის თავდაცვის სამინისტრომ გაავრცელა.

სამინისტროში ფიქრობენ, რომ ინციდენტში ისრაელია დამნაშავე, რომელიც იმ დროს ლატაკიას პროვინციას ბომბავდა. როგორც BBC-ის რუსული ბიურო წერს, ავიაკატასტროფის შედეგად 15 ადამიანი გარდაიცვალა.

"ისრაელის მფრინავებმა რუსული თვითმფრინავი ფარად გამოიყენეს, რის გამოც სირიის ანტისაჰაერო თავდაცვის ცეცხლის ქვეშ მოყვა", — ამის შესახებ რუსეთის თავდაცვის სამინისტროს ოფიციალურმა წარმომადგენელმა განაცხადა.

მისივე თქმით, შეუძლებელი იყო, რომ ისრაელის მფრინავებს თვითმფრინავი ვერ შეემჩნიათ, თუმცა "პროვოკაციაზე მაინც წავიდნენ", ამის შემდეგ კი რუსეთი ადეკვატური რეაქციის უფლებას იტოვებს:

"ისრაელის უპასუხისმგებლო ქმედებების გამო რუსეთის 15 სამხედრო მოსამსახურე დაიღუპა. ეს რუსეთ-ისრაელის პარტნიორობის სულისკვეთებას არ პასუხობს".

ორშაბათს ისრაელის ოთხმა მოიერიშე თვითმფრინავმა ქალაქ ლატაკიას რაიონში სირიის ობიექტები დაბომბა. მოსკოვში ისრაელის საელჩომ ინციდენტის შეფასებაზე უარი თქვა.

მანამდე, რუსეთის თავდაცვის სამინისტროში განაცხადეს, რომ თვითმფრინავი-მზვერავი IL-20, რომელიც ხმელთაშუა ზღვის თავზე დაფრინავდა, ისრაელელი მფრინავების ავიადარტყმის შედეგად რადარებიდან გაუჩინარდა.