პარლამენტის ვიცე-სპიკერის, თამარ ჩუგოშვილის თქმით, საზოგადოების რეაქციიდან გამომდინარე მარიხუანის კულტივაცია-ექსპორტის საკითხის განხილვის გადადება ლოგიკური იყო.

"კანონპროექტი ორი ნაწილისგან შედგება. როგორც ჩანს, კანონპროექტის პირველ ნაწილთან დაკავშირებით, რომელიც მოხმარების რეგულაციას შეეხება, ნაკლები მოსაზრებები და დისკუსია არსებობს. ბევრად მეტი დისკუსია გამოიწვია კანონპროექტის მეორე ნაწილმა, რომელიც შეეხებოდა ფარმაცევტული მიზნებისთვის კულტივაციის საკითხს. ბუნებრივი და ლოგიკურია, ჩემი აზრით, რომ გადავდოთ ამ საკითხის განხილვა", — აღნიშნა ჩუგოშვილმა.

მისივე თქმით, გადამწყვეტი იყო საზოგადობის რეაქცია, რომელსაც ამ საკითხის მიმართ ჰქონდა ნეგატიური დამოკიდებულება, თუმცა საპატრიარქომაც დიდი გავლენა იქონია გადაწყვეტილებაზე.

გუშინ, 16 სექტემბერს მართლმადიდებელი ეკლესიის მღვდელმსახურებმა ახალი კანონპროექტის საწინააღმდეგო პარაკლისი აღავლინეს.

ამავე დროს, პარლამენტის თავმჯდომარემ, ირაკლი კობახიძემ განაცხადა, რომ კანაფის კულტივაციის საკითხზე აუცილებელია საზოგადოების სწორად ინფორმირება და ამასთან დაკავშირებით ფართო კონსულტაციები იქნება.

საქართველოს შინაგან საქმეთა სამინისტრო სამთავრობო გუნდთან ერთად მუშაობს კანონპროექტზე, რომელიც მარიხუანისგან წარმოებული მედიკამენტების ექსპორტზე გატანას გულისხმობს.

მარიხუანის მიერ დამზადებული სამედიცინო მედიკამენტების მოხმარება ლეგალურია მსოფლიოს არაერთ ქვეყანაში, მათ შორისაა დიდი ბრიტანეთი, ავსტრალია, ნიდერლანდები, აშშ-ს ზოგიერთი შტატი, კანადა, ურუგვაი, ისრაელში და პორტუგალია.

გაიგეთ მეტი: