დღეს საქართველოს განათლების მინისტრმა ალექსანდრე ჯეჯელავამ ვიდეო მიმართვა გაავრცელა, სადაც ის უმაღლესი განათლების მნიშვნელობაზე საუბრობს.

მინისტრი მიიჩნევს, რომ უმაღლესი განათლება მხოლოდ მათთვისაა, ვისაც განსაკუთრებული აკადემიური წარმატება აქვს:

"ძალიან ბევრ ქვეყანაში, და ჩვენთანაც ასე უნდა იყოს, უმაღლეს განათლებას იმიტომ ჰქვია უმაღლესი განათლება, რომ ის არ არის საყოველთაო, არ არის ყველა ადამიანისთვის. უმაღლესი განათლება უნდა იყოს მხოლოდ იმ ადამიანებისთვის, ვინც განსაკუთრებულ აკადემიურ წარმატებას აღწევს".

მინისტრის თქმით, მას უამრავი წერილი მისდის იმ აბიტურიენტებისგან, რომლებმაც ეროვნულ გამოცდებზე ბარიერი ვერ გადალახეს. მინისტრის თქმით, ისინი ცხოვრებას ტრაგიკულად უყურებენ, თუმცა მათთვის ისეთი ალტერნატივები არსებობს, როგორიცაა პროფესიული განათლება და ტრენინგები, ან მომავალ წელს ხელმეორედ ცდა.

"ჩვენ გვჭირდება პროფესიონალები, ძალიან ბევრი უსამსახურო იურისტი გვყავს და ძალიან გვიჭირს სასტუმროს ადმინისტრატორები" - აცხადებს მინისტრი.

ალექსანდრე ჯეჯელავას თქმით, საქართველოსთვის აბიტურიენტების 16%, რომლებმაც ბარიერი ვერ გადალახეს, არც ისე მაღალი მაჩვენებელია:

"ზოგ ქვეყანაში ეს არის 25%, ზოგგან 50 და მეტიც".