მოქალაქეების ნაწილი პარტია პატრიოტთა ალიანსისგან SMS-შეტყობინებებს იღებს, ტექსტით: "ნაციონალური მოძრაობის მმართველობა გამოცხადდეს სააკაშვილი-ბოკერიას დამნაშავე რეჟიმად. 1 — კი, 2 — არა, 3 — NoSMS".

პატრიოტთა ალიანსის წარმომადგენელმა, ბესო ცქიფურიშვილმა On.ge-სთან საუბარში დაადასტურა, რომ პარტია უგზავნის მოქალაქეებს შეტყობინებებს, რაც მისივე თქმით, ამ რეზოლუციის შინაარსის საზოგადოებამდე მიტანას ემსახურება:

"ეს რეზოლუცია ამ ეტაპზე იურიდიულ კომიტეტშია განხილვაზე. ამის გარდა, ეს იმის დემონსტრირებაა, რომ რეზოლუციის პროექტი არა ექვსი დეპუტატის მიერ, არამედ საქართველოს მოსახლეობის უმრავლესობის მიერაა ინიცირებული".

პარტიამ იმავე შინაარსით რეზოლუცია 2 ივლისის პარლამენტის ბიუროს სხდომაზე დაარეგისტრირა.

პატრიოტები დოკუმენტში ყოფილი პრეზიდენტის, მიხეილ სააკაშვილისა და მისი ყოფილი თანაგუნდელის, გიგა ბოკერიას მმართველობის პერიოდს "ავტორიტარულს" უწოდებენ.

პროექტის განმარტებით ბარათში რეზოლუციის მიღების მიზნად განისაზღვრა საქართველოში სამართლიანობის აღდგენა, დანაშაულებრივი ქმედებების გამოძიება, გამოაშკარავება და დამნაშავეების დასჯა.