საქართველოს პრეზიდენტობის კანდიდატის, სალომე ზურაბიშვილის განცხადებით, როცა არავინ არაფერს ამბობს და მტკიცებულებები არ არსებობს, ძალიან რთულია სამართალდამცველებზე გადაბრალება, რომ ისინი ვერ ახერხებენ ბოლომდე მიიყვანონ საქმე. ასე უპასუხა პრეზიდენტობის კანდიდატმა ტოკ-შოუ რეაქციაში ხორავას ქუჩის საქმეზე დასმულ კითხვას.

მისი თქმით, აქციაზე პოლიტიკური განცხადებები კეთდება, რაც საქმეში არ ჯდება.

"მე მესმის მამის მდგომარეობის, რომელსაც თვითონ აქვს არა მხოლოდ ეჭვები, არამედ შინაგანი რწმენა, ამიტომ მას გააჩნია უსამართლობის განცდა. აქციაზე არის ის პოლიტიკური განაცხადები, რომელიც არ ჯდება ამ საქმეში", - განაცხადა სალომე ზურაბიშვილმა.

მისი თქმით, ხორავას ქუჩის საქმე ძალიან დიდი განსხვავებაა ირინა ენუქიძის პროტესტისგან.

"იქ უშუალოდ იყო რეჟიმი, პოლიცია და ზონდერები, რომლებიც კლავდნენ ახალგაზრდებს. აქ არანაირი პირდაპირი ჩარევა ხელისუფლების, რომ ვინმე მოეკლა არ არის. თანაგრძნობა არის ერთი რამ, რაც ყველას მოგვეთხოვება, როგორ შეიძლება არ თანაუგრძნო ადამიანს. მაგრამ თანაგრძნობა არის ერთი და პოლიტიკური პოზიციის დაკავება მეორე, როცა არასწორი პოლიტიკური პოზიციების საჭიროება მთავრობა გადაგდეს, არ არსებობს", - განაცხადა ზურაბიშვილმა.

პარლამენტთან მიმდინარე აქციისას პოლიციასთან დაპირისპირების დროს ზაზა სარალიძე შეუძლოდ გახდა. სარალიძე მაჩალიკაშვილთან ერთად მეორე დღეა შიმშილობდა. სარალიძეს ცხრა საათზე სპეციალური განცხადება უნდა გაევრცელებინა.

სარალიძისა და მაჩალიკაშვილის მხარდამჭერ აქციაზე, წვიმის გამო აქციის მონაწილეები კარვის გაშლას ცდილობდნენ. ადგილზე მყოფმა სამართალდამცავებმა მათ კარვის გაშლის უფლება არ მისცეს, რასაც აქციის მონაწილეებსა და პოლიციას შორის დაპირისპირება მოყვა.

დაპირისპირებისას სარალიძემ სამართალდამცავებს მოკლული შვილის, დათო სარალიძის ფოტო აჩვენა და მოუწოდა გაეთელათ ის ფეხქვეშ. სარალიძის თქმით, მათი საქციელი სწორედ ამას ნიშნავდა. ზაზა სარალიძე ინგოროყვას კლინიკაში გადაიყვანეს.