საგამოძიებო კომისიამ მუშაობის პროცესში მოპოვებული მტკიცებულებებით, ხორავას ქუჩის საქმეში, ყველაზე საკამათო, ფარდულის ეპიზოდი აღადგინა.

კომისიის წევრების ცნობით, მოიპოვეს არაერთი ჩვენება, რომლითაც დასტურდება მ.კ.-ს მხრიდან გარკვეული საგნის, ე.წ. ტარის ქონა და ჩხუბისას მისი სარალიძის მისამართით გამოყენება.

ფარდულის ეპიზოდი, სადაც დავით სარალიძე მოკლეს

"დავით სარალიძემ შებოჭვის მსგავსი ილეთით შეაგდო გ.ჯ. ფარდულში. გ.ჯ. მას მოქცეული ჰყავდა მოხრილ მდგომარეობაში და ზემოდან იჭერდა ხელებით. ამ მდგომარეობაში გ.ჯ.-მ ამოიღო დანა და გულ-მკერდისა და მუცლის მიდამოებში ჭრილობები მიაყენა სარალიძეს, რის შემდეგაც მას დანა დაუვარდა. ფარდულში ასევე იმყოფებოდა მ.კ., რომელმაც როგორც კომისიამ დაადგინა ჩხუბის დაწყებისას ხელი ჩაიყო ჯიბეში, შემდეგ ჩხუბის დროს მ.კ.-ს ხელში ჰქონდა საგანი, ზემოთ აღნიშნული ტარი, რომელსაც ურტყამდა დავით სარალიძეს და შემდგომ სახელოში მალავდა. კომისიას ერთ-ერთმა გამოკითხულმა არასრულწლოვანმა ვიზუალურადაც დაუხატა ესკიზი თუ როგორი ნივთი უნდა ჰქონოდა მ.კ.,- ს და რომელსაც შესაძლებელია ჰქონოდა ბასრი პირი ან ყოფილიყო მის გარეშე. ფარდულში დავით სარალიძეს ეხმარებოდა დ.ღ., რომელიც შემდგომ გადაერთო ეზოში მიმდინარე ჩხუბზე.

ფარდულში ასევე იმყოფებოდა გ.მ., რომელმაც დავით სარალიძესთან ჩხუბის დროს მიიღო ჭრილობა ზურგის არეში, ის უშუალო შემხებლობაში იყო დავით სარალიძესთან. მის ტანსაცმელსა და ფეხსაცმელზე დავით სარალიძის სისხლი აღმოჩნდა. ხაზგასმით უნდა აღვნიშნოთ, რომ გამოძიების მიერ, თავის დროზე არ დამუშავებულა ვერსია და არ ჩატარებულა შესაბამისი საგამოძიებო მოქმედებები, რომელიც გაარკვევდა გ.მ.-ს როლს სარალიძის ჯგუფურ მკვლელობაში.

გ.ბ.-ს დავით სარალიძესთან ფიზიკური შემხებლობა გამოძიების მიერ მოპოვებული მტკიცებულებათა ერთობლიობით არ უდასტურდება.

მას შემდეგ, რაც მოზარდებმა დაინახეს მძიმედ დაჭრილი დავით სარალიძე, რომელსაც 12 ჭრილობა ჰქონდა მიყენებული, ისინი გაიქცნენ ხორავას ქუჩის მიმართულებით. გაქცევისას თაღთან მოხდა დაპირისპირება გ.ბ-სა და ლევან დადუნაშვილს შორის, რომლის დროსაც გ.ბ.-მ მუცლის ღრუსა და გულ-მკერდის არეში ჭრილობები მიაყენა ლევან დადუნაშვილს.

ჩხუბის ბოლო ეპიზოდში თაღის შესასვლელში ასევე იმყოფებოდა ოთხი არასრულწლოვანი, რომლებიც მაშინვე გარბიან ეზოდან, როცა მოზარდების პირველმა ნაწილმდა დაიწყო გაქცევა.

ჩხუბის შემდეგ მოზარდებმა ეზო სხვადასხვა თანმიმდევრობით დატოვეს. სვანიძის ქუჩის მოზარდები ავიდნენ გუდაურის ქუჩაზე, სადაც ზ.ტ. დაეხმარა დაჭრილ გ.მ.-ს გაეწმინდა ზურგი, საიდანაც მას სდიოდა სისხლი, ჩხუბის დროს მიყენებული ჭრილობიდან. იქვე გ.ჯ.-მ აღნიშნა, რომ შემთხვევის ადგილზე დანა დაუვარდა. გუდაურის ქუჩაზე მოზარდებს გამოეყო მ.კ., რომელმაც სისხლიანი დანა გამოართვა გ.ბ,-ს და წავიდა წყლის საყიდლად იქვე მდებარე მაღაზიისკენ, მას თან წაჰყვა ზ.ტ. დანარჩენი ქუჩის მოზარდები კვლავ ჩავიდნენ ხორავას ქუჩაზე და გაემართნენ ხორავას ქუჩის 26-სკენ, სადაც ეზოში არის ონკანი.

მას შემდეგ, რაც მ.კ.-მ იყიდა წყალი, ის და ზ.ტ. ასევე გაემართნენ ხორავას 26-ში მდებარე ეზოსკენ. ეზოში გ.ჯ.-მ ონკანზე დაიბანა სისხლიანი თავი, მ.კ.-მ დანა დაუბრუნა გ.ბ.-ს.

კომისიამ დაადგინა, რომ ონკანიან ეზოში მ.კ.-ს ხელში ეჭირა კვლავ ნივთი, ე.წ. ტარი, რომელიც აჩვენა თავის მეგობრებს და უთხრა, რომ ამ საგანს ურტყამდა დავით სარალიძეს. ეზოში შეკრებილი მოზარდები იყვნენ აღელვებულები და განიხილავდნენ ჩხუბის დეტალებს. ამავე ეპიზოდში, მ.კ.-მ ონკანიანი ეზოდან დაურეკა თავის ძმას ლუკა კალანდიას და სთხოვა მისვლა დასახმარებლად".

კომისიის წევრების პოზიციით, მ.კ.-ს მხრიდან გარკვეული საგნის ქონა და ჩხუბის დროს მისი გამოყენება კიდევ უფრო ამყარებს კომისიის მხრიდან გაცემულ შუალედურ რეკომენდაციას, დაწყებულიყო სისხლის სამართლებრივი დევნა მ.კ.-ს მიმართ არასრულწლოვანი დავით სარალიძის განზრახ ჯგუფური მკვლელობის ბრალდებით, დანაშაული გათვალისწინებული სისხლის სამართლის კოდექსის 109-ე მუხლის 2-ე ნაწილის “ბ” და “ე” ქვეპუნქტებით.

მ.კ. ხორავას ქუჩაზე მომხდარი მკვლელობის საქმეზე დანაშაულის დაფარვაშია ბრალდებული.

საგამოძიებო კომისია

პარლამენტში ხორავას ქუჩაზე მოკლული ორი მოზარდის საქმესთან დაკავშირებით პარლამენტის დროებითი საგამოძიებო კომისია 6 ივნისს შეიქმნა.

საქართველოს კანონმდებლობით კომისია ვალდებულია, შექმნიდან ზუსტად სამი თვის თავზე წარმოადგინოს დასკვნა. ბოლო თვეების განმავლობაში კომისიის წინაშე წარგნენ, როგორც საგამოძიებო ორგანოების თანამდებობის პირები, ისე ხორავას ქუჩაზე მომხდარი მკვლელობის მოწმეები და აღმასრულებელი ხელისუფლების წარმომადგენლები. კომისიის ერთ-ერთ ბოლო საჯარო სხდომაზე გამოკითხეს შინაგან საქმეთა მინისტრი გიორგი გახარია და ყოფილი მთავარი პროკურორი, ირაკლი შოთაძე.

2018 წლის 31 მაისს ხორავას ქუჩაზე მომხდარი მკვლელობის საქმეზე მოსამართლემ განაჩენი გამოაცხადა, რასაც დაზარალებული ზაზა სარალიძის მხრიდან პროტესტი მოჰყვა. მან ქუჩის გამოსვლების ორგანიზება დაიწყო.

მთავარი პროკურორი ირაკლი შოთაძე, რომლის უწყების პოზიციაც სასამართლომ ბოლომდე არ გაიზიარა, თანამდებობიდან გადადგა. მკვლელობის საქმეზე ახალი გარემოებების დადგენის მიზნით, შსს-მ ხელახალი გამოძიება დაიწყო, რომელსაც უშუალოდ გიორგი გახარია ხელმძღვანელობს. გამოძიების ფარგლებში მირზა სუბელიანი დანაშაულის შეუტყობინებლობისთვის, ხოლო მერაბ მორჩაძე მოწმეზე ზემოქმედების ბრალდებით დააკავეს.