ცოლის მიმართ განხორციელებულ ძალადობაში ბრალდებულს 1 წლით და 3 თვით თავისუფლების აღკვეთა მიესაჯა. ამის შესახებ ინფორმაცია პროკურატურამ გაავრცელა.

უწყების ცნობით, მსჯავრდებულმა არასრულწლოვანი შვილების თანდასწრებით სისტემატიურ სიტყვიერ შეურაცხყოფას აყენებდა მეუღლეს, ხოლო 2018 წლის 14 ივნისს და 15 ივნისს მასზე ფიზიკურად იძალადა. აღნიშნულით დაზარალებულმა განიცადა ტანჯვა, ფიზიკური ტკივილი და მიიღო სხეულის მსუბუქი ხარისხის დაზიანება ჯანმრთელობის მოშლის გარეშე.

სამართალდამცველებმა მსჯავრდებული 2018 წლის 20 ივნისს დააკავეს. მას ბრალად ედება ოჯახის ერთი წევრის მიერ ოჯახის სხვა წევრის მიმართ ძალადობა, რამაც გამოიწვია ფიზიკური ტკივილი, ჩადენილი არასრულწლოვნის თანდასწრებით. მსჯავრდებულს სასჯელის სახედ და ზომად 1 წლით და 3 თვით თავისუფლების აღკვეთა განუსაზღვრა.