2018 წელსაც, 2017 წლის არჩევნების მსგავსად, სოციალური ქსელში დეზინსფორმაციის კამპანიები და Fake-სიახლეები ისევ მთავარი გამოწვევაა. ამის შესახებ სამართლიანი არჩევნებისა და დემოკრატიის საერთაშორისო საზოგადოების (ISFED) მიერ ჩატარებულ წინასაარჩევნო მონიტორინგშია ნათქვამი.

სამართლიანი არჩევნების ანგარიშში ვკითხულობთ, რომ საარჩევნო კამპანიის გააქტიურების პარალელურად, Facebook-ზე უკვე ვრცელდება დეზინფორმაცია სხვადასხვა საპრეზიდენტო კანდიდატის შესახებ.

ISFED-ის დაკვირვებით, იზრდება ისეთი გვერდების რაოდენობა, რომელთა მიზანი ღირებულებით თემებზე მწვავე დისკუსიის მაპროვოცირებელი ნარატივების წახალისება, რუსული პროპაგანდის მესიჯების გავრცელება და ანტი-დასავლური განწყობების გაღვივებაა.

სამართლიანი არჩევნები მიიჩნევს, რომ სოციალურ ქსელებში გაურკვეველი დაფინანსებით წარმოებული დეზინფორმაციის კამპანია საფრთხეს უქმნის საარჩევნო პროცესს და თანასწორ საარჩევნო კამპანიას, ხოლო ცრუ ინფორმაციისა და ნარატივების გავრცელება დემოკრატიულ პროცესს აფერხებს.

ISFED 2018 წლის საპრეზიდენტო არჩევნებზე სოციალური მედიის მონიტორინგის საპილოტე პროგრამას ახორციელებს, რომლის მიზანიც Facebook-ზე არჩევნების კონტექსტში აქტივობისა და დეზინფორმაციისა გამოვლენა, დოკუმენტირება და ანალიზია.

ორგანიზაციის რეკომენდაციით, მნიშვნელოვანია, რომ აუდიტის სამსახურმა სოციალურ ქსელებსა და ინტერნეტსივრცეში პოლიტიკური მიზნით ფინანსების ხარჯვაზე ეფექტიანი კონტროლი განახორციელოს.

"ამ ეტაპზე საარჩევნო პროცესებში დეზინფორმაციასთან ბრძოლის მიმართულებით სახელმწიფოს მხრიდან კონკრეტული ნაბიჯების შესახებ ცნობილი არ არის", - ნათქვამია სამართლიანი არჩევნების ანგარიშში.

აუდიტის სამსახურის განმარტებით, უწყება მუდმივად ახორციელებს პოლიტიკური პარტიების შემოსავლებისა და ხარჯების მონიტორინგს - როგორც დეკლარაციებისა და საბანკო გადარიცხვების კონტროლით, ასევე სოციალური მედიის მონიტორინგის საშუალებით.

"პოლიტიკური ფინანსების მონიტორინგის დეპარტამენტი ყოველდღიურად და უწყვეტ რეჟიმში სწავლობს პარტიების მიერ სოციალურ მედიაში განთავსებული ინფორმაციის ხარჯებს, ძირითადად, ეს მოიცავს გარეკლამებული ინფორმაციის გავრცელებას, ასევე სარეკლამო ბანერის ზომას, ვიდეორგოლის ქრონომეტრაჟს და ა.შ.", - ნათქვამია აუდიტის სამსახურის მიერ On.ge-ს მიწოდებულ წერილობით კომენტარში.

აქვე აღნიშნულია, რომ ყველა პოლიტიკური პარტია ვალდებულია წარადგინოს ინფორმაცია მათ მიერ გაწეული სარეკლამო ხარჯების შესახებ.