ახალი აკადემიური წლის დაწყებისთანავე, შოტლანდიის მთავრობა ქვეყნის მასშტაბით არსებულ ყველა სკოლას, კოლეჯსა და უნივერსიტეტს ჰიგიენურ პროდუქციას დაურიგებს. ცვლილება მიზნად ისახავს მოსწავლეებსა და სტუდენტებს შორის სიღარიბის დაძლევას, მენსტრუაციის დროს.

მთავრობის გეგმა აბერდინში (ქალაქი შოტლანდიაში) განხორციელებულ საპილოტე პროგრამას მიჰყვება. ქალაქის მასშტაბით, ჰიგიენური ნივთები სკოლის გარდა, იმ ადგილებშიც დარიგდა, სადაც მცხოვრებ ქალებს დაბალი შემოსავალი ჰქონდათ.

ბოლო კვლევით, რომელიც 2 000 ახალგაზრდა შოტლანდიელს შორის ჩატარდა, გაირკვა, რომ, სიღარიბის გამო, ყოველი მეოთხე მოსწავლე/სტუდენტი ჰიგიენური პროდუქციის შეძენას ვერ ახერხებს.

მთავრობის წარმომადგენლის თქმით, შოტლანდია ერთ-ერთი მოწინავე ქვეყანაა, რომელიც სიღარიბის ამ ასპექტს დაუპირისპირდა:

"ისეთ მდიდარ ქვეყანაში, როგორიც შოტლანდიაა, მიუღებელია, ადამიანებს ელემენტარული ჰიგიენური ნივთებზე ხელი არ მიუწვდებოდეთ. ამ ინვესტიციით შეძენილი პროდუქცია იმ ახალგაზრდებს დაურიგდებათ, ვისაც სჭირდებათ. ამ პრობლემის მოგვარება სტუდენტებს დაეხმარება, უკეთ ფოკუსირდნენ სწავლაზე".

მთავრობას აღნიშნული პროექტისთვის 6,68 მილიონი დოლარი [5,2 მილიონი გირვანქა სტერლინგი] აქვს გამოყოფილი.