შინაგან საქმეთა სამინისტროს ინფორმაციით, სოფელ განმუხურში მიმდინარე ელექტრონული მუსიკის ფესტივალზე Echowaves ნარკოდანაშაულისთვის 4 პირი დააკავეს.

უწყების განცხადებით, სამართალდამცველებმა ოპერატიული-საგამოძიებო მუშაობის შედეგად ფესტივალის დაწყების პირველივე დღეს ირანის 2 და საქართველოს 2 მოქალაქე ნარკოტიკული საშუალებების უკანონო შეძენა-შენახვის ბრალდებით დააკავეს. საქმეზე გამოძიება სისხლის სამართლის კოდექსის 260-ე მუხლის პირველი ნაწილით მიმდინარეობს, რაც ნარკოტიკული საშუალებების უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღებას გულისხმობს.

25 აგვისტოს ფესტივალიდან, სასწრაფო დახმარების ჯგუფებმა საავადმყოფოში სამი ახალგაზრდა გადაიყვანეს. ერთ-ერთი მათგანი სამედიცინო დაწესებულებაში მისვლამდე გარდაიცვალა. საავადმყოფოს დირექტორის განცხადებით ახალგაზრდას უცნობი სუბსტანციით ინტოქსიკაცია აღენიშნებოდა.

როგორც შინაგან საქმეთა სამინისტრომ On.ge-ს განუცხადა, საქმეზე გამოძიება საქართველოს სისხლის სამართლის კოდექსის 115-ე მუხლით მიმდინარეობს, რაც თვითმკვლელობამდე მიყვანას გულისხმობს. შსს-ს ცნობით, საქმეზე დანიშნულია ექსპერტიზა.