დღეს კონსტიტუციაში ოჯახი განმარტების ჩაწერის ინიციატორებსა და პრეზიდენტის შეხვედრა იგეგმება. ჯგუფმა 200 ათასზე მეტი ხელმოწერა უკვე შეაგროვა და ცესკოსაც წარუდგინა.

პარტია თამაზ მეჭიაური - ერთიანი საქართველოსათვის წევრი, თამაზ ბრეგაძე აცხადებს, რომ პრეზიდენტი ვალდებულია ქვეყნის ნახევარი მილიონი მოქალაქის მოთხოვნა გაითვალისწინოს, წინააღმდეგ შემთხვევაში დაიწყება საპროტესტო აქციები.

ერთიანი ნაციონალური მოძრაობის წარმომადგენელი მიხეილ მაჭავარიანი აცხადებს, რომ საინიციატივო ჯგუფს ამ საკითხის წინ წამოწევით სხვა მნიშვნელოვანი თემების გადაფარვა სურს:

"პრეზიდენტმა დაახლოებით ორი თვის წინ მკაფიოდ დააფიქსირა საკუთარი აზრი და გაიხსენა ილია ჭავჭავაძე და სხვა კლასიკოსები და განმარტა, თუ რატომ არ სჭირდება საზოგადოებას ამ თემაზე დისკუსია და საუბარი".

ინიციატივის მოწინააღმდეგეა პოლიტიკური მოძრაობა ახალი საქართველოს თავმჯდომარე გიორგი ვაშაძეც და აცხადებს, რომ კონსტიტუციაში ოჯახის ცნება ისედაცაა ჩაწერილი და ახლა ამ საკითხზე საუბარი სრულიად სპეკულაციურია.

საინიციატივო ჯგუფი პრეზიდენტთან შეხვედრამდე მოლაპარაკებებს, ერთიანი ნაციონალური მოძრაობის გარდა, თითქმის ყველა პარტიასთან აწარმოებს.