შინაგან საქმეთა სამინისტრომ მთავარ პროკურატურასთან ერთად, თაღლითობის ბრალდებით ფიქტიური საბროკერო კომპანია ეფიქს ბიზნეს გრუპის სამი დამფუძნებელი დააკავა.

უწყების ცნობით, ოპერაცია ხუთი თვის განმავლობაში მიმდინარეობდა. გამოძიების ვერსიით, ბრალდებულებმა 2016 წლის აგვისტოში დაარეგისტრირეს შპს ეფიქს ბიზნეს გრუპი, რომლის საქმიანობის ძირითად საგანს, თითქოსდა საერთაშორისო საფონდო ბირჟაზე ვაჭრობა წარმოადგენდა.

"დანაშაულებრივი ჯგუფის წევრებმა, დაახლოებით, 50 მოქალაქე მოატყუეს, რომ სავაჭრო ბირჟაზე წარმოადგენდნენ საშუამავლო საბროკერო კომპანიას და იმ შემთხვევაში, თუ ისინი განსაზღვრულ ანგარიშზე თანხას შეიტანდნენ, კომპანია მათ სავაჭრო ბირჟაზე გარკვეული თანხების მოგებაში დაეხმარებოდა", - ნათქვამია შსს-ს განცხადებაში.

შსს-ს ცნობით, ბრალდებულებმა წინასწარ განსაზღვრულ ანგარიშზე მოქალაქეებს შეატანინეს სხვადასხვა ოდენობის თანხები, რის შემდეგაც შეცვალეს დაზარალებულების კომპიუტერული მონაცემები, რათა მათ ეფიქრათ, რომ თანხა წარუმატებელი ვაჭრობის შედეგად წააგეს და კომპანიის მიმართ პრეტენზიები არ ჰქონოდათ.

უწყების ინფორმაციით, დანაშაულებრივი ჯგუფის წევრები უკანონოდ დაეუფლნენ, დაახლოებით, 500 000 ლარს.

დაკავებულებს ბრალი ედებათ კომპიუტერულ სისტემაში უნებართვო შეღწევაში, მონაცემების უკანონო შეცვლასა და ორგანიზებული ჯგუფის მიერ, სამსახურებრივი მდგომარეობის გამოყენებით, დიდი ოდენობით თანხების თაღლითურად დაუფლებაში.