თურქეთის პრეზიდენტმა რეჯეპ ტაიპ ერდოღანმა სტამბოლში შეკრებილ მხარდამჭერებს 7 აგვისტოს განუცხადა, რომ ის დაამტკიცებს კანონს სიკვდილით დასჯის შესახებ, თუ პარლამენტი მიიღებს აღნიშნულ ნორმას. ერდოღანისვე თქმით, ყველა პოლიტიკურმა პარტიამ უნდა დაუჭიროს მხარი ხალხის სურვილს. პროსახელისუფლებო გამოცემა Hurriyet Daily-ს ინფორმაციით, 7 აგვისტოს სტამბოლში მოეწყო მარში "დემოკრატიისა და წამებულთა პატივსაცემად", რომელშიც მილიონობით ადამიანი მონაწილეობდა.

როგორც თურქული გამოცემა წერს, ერდოღანის გამოსვლის დროს ისმოდა ხალხის შეძახილები სიკვდილით დასჯის მოთხოვნით. ერდოღანის თქმით, თურქეთში 1984 წლამდე მოქმედებდა სიკვდილის დასჯა. როგორც თურქეთის პრეზიდენტმა აღნიშნა, სიკვდილით დასჯა დღემდე მოქმედებს აშშ-ში, იაპონიასა და "ბევრ სხვა ქვეყანაში". მან ასევე პირობა დადო, რომ აშშ-ში მცხოვრებ ფეტულა გიულენს, რომელსაც 15 ივლისის გადატრიალების მცდელობაში ადანაშაულებს თურქეთის ხელისუფლება, "კანონის ფარგლებში იქნება განადგურებული".

2016 წლის 15 ივლისს თურქეთში სამხედრო გადატრიალების მცდელობა იყო. ბოლო მონაცემებით:

  • გარდაცვლილია 246 ადამიანი.
  • დაშავებულია 1400-ზე მეტი მოქალაქე.
  • დახურულია 130 მედია საშუალება.
  • გაცემულია 42 ჟურნალისტის დაკავების ორდერი.
  • სამსახურიდან გაშვებულია 66 ათასამდე საჯარო მოხელე.
  • გიულენთან კავშირის ბრალდებით თურქეთში ფეხბურთის 100-მდე მსაჯი გაათავისუფლეს.
  • ქვეყანაში სამთვიანი საგანგებო მდგომარეობაა გამოცხადებული.

აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.