პირველ აგვისტოს თბილისში, გლდანში ჰომოფობიური სიძულვილის მოტივით სამ პირს ფიზიკური და სიტყვიერი შეურაცხყოფა მიაყენეს. ამის შესახებ ინფორმაციას თანასწორობის მოძრაობა ავრცელებს.

"პოლიცია თავიდან გულგრილად ეკიდებოდა საქმეს, თუმცა თანასწორობის მოძრაობის იურისტის და საგამოძიებო ნაწილში სხვა განყოფილების ჩართვის შემდეგ, პოლიციის დამოკიდებულება გაუმჯობესდა. დაზარალებულებმა ამ წამს დატოვეს ექსპერტიზის სამსახური. ჩვენ ვამონიტორინგებთ ამ საქმეს, რათა დამნაშავეები საკადრისად დაისაჯონ", - წერს ფეისბუქზე ლევან ბერიანიძე, ორგანიზაციის ხელმძღვანელი.

მისი თქმით, ეს პირველი შემთხვევა არაა და ამის გამო სახელმწიფომ ჰომოფობიასთან ბრძოლის ეფექტიანი სტრატეგია უნდა შეიმუშაოს.

შინაგან საქმეთა სამინისტროს ინფორმაციით, ამ საქმეზე ორი პირი გამოავლინეს.

"შინაგან საქმეთა სამინისტროს საპატრულო პოლიციის დეპარტამენტმა გლდანში გენდერული იდენტობის ნიშნით მოტივირებული ძალადობის ფაქტზე გამოძიება დაიწყო", - აცხადებენ შსს-ში.

მათივე ინფორმაციით, საქმეზე გამოძიება სისხლის სამართლის კოდექსის 126-ე მუხლის პირველი ნაწილით დაიწყო. ამ მუხლით, ცემა ან სხვაგვარი ძალადობა, რამაც დაზარალებულის ფიზიკური ტკივილი გამოიწვია, ისჯება ჯარიმით ან საზოგადოებისათვის სასარგებლო შრომით ვადით ას ოციდან ას ოთხმოც საათამდე ან შინაპატიმრობით ვადით ექვსი თვიდან ერთ წლამდე ანდა თავისუფლების აღკვეთით ვადით ერთ წლამდე, იარაღთან დაკავშირებული უფლებების შეზღუდვით ან უამისოდ.