კომპანია თელასი საგანგებო განცხადებას ავრცელებს და განმარტავს, რომ საჰაერო ელექტროგადამცემი ხაზების ქვეშ და მათი დაცვის ზონებში სხვადასხვა ობიექტების მსვლელობები უნდა აიკრძალოს.

კომპანიიის თქმით, მიუხედავად იმისა, რომ კომპანიამ არაერთხელ მიმართა მერიას ამ საკითხის მოსაგვარებლად, თელასის 35-110-კილოვოლტიან საჰაერო ელექტროგადამცემი ხაზების ქვეშ უსაფრთხოების ნორმების აშკარა დარღვევით ისევ შენდება საცხოვრებელი სახლები, საზოგადოებრივი ობიექტები და ეწყობა სამშენებლო ნარჩენების ხელოვნური მიწაყრილები:

"გეგმიური შემოვლა-დათვალიერების დროს აღმოჩნდა, რომ ვარკეთილის დასახლებაში, ოლიმპიური სოფლის ტერიტორიაზე, ჩვენს ბალანსზე არსებული 110კვ სტრატეგიული მნიშვნელობის, სატრანზიტო დანიშნულების საჰაერო ელექტროგადამცემი ხაზების მახათა-2 და კენისი-4 სადენების ქვეშ საცურაო აუზებისა და გასართობი ცენტრების სამშენებლო სამუშაოები ხორციელდება.

სამუშაოები, რომელსაც კომპანია Hualing ატარებს, კატეგორიულად ეწინააღმდეგება ელექტროდანადგარების მოწყობის წესებისა და უსაფრთხოების ტექნიკის ნორმებს და შესაძლოა მასობრივი უბედური შემთხვევების მიზეზი გახდეს".

ზემოთქმულის გარდა, კომპანია ასევე განმარტავს, რომ ასეთ ზონებში აშენებული ობიექტები ისინი ხელს უშლის გადამცემი ხაზების ნორმალურ რეჟიმში ფუნქციონირებას, გეგმიური ტექნიკური მომსახურეობის ან შესაძლო ავარიული სამუშაოების სრულყოფილად განხორციელებას, რაც ნეგატიურ გავლენას მოახდენს მომხმარებლების ელექტრომომარაგების ხარისხზე.

თელასი მოუწოდებს სამშენებლო კომპანიებს, სასწრაფოდ მიიღონ შესაბამისი ზომები და მიმართავს მერიას თხოვნით, შემოწმდეს რამდენად დაცულია ელექტროდანადგარების მოწყობისა და უსაფრთხოების ტექნიკის ნორმები და მიიღოს გადამწყვეტი ზომები.