თეთრმა სახლმა CNN-ის ჟურნალისტი, კეიტლან კოლინსი აშშ-ის პრეზიდენტისა და ევროკომისიის თავმჯდომარის პრესკონფერენციაზე არ დაუშვა. გამოცემის ინფორმაციით, დონალდ ტრამპისა და ჟან-კლოდ იუნკერის ფოტოსესიის დროს ის "უადგილო კითხვებსა და ყვირილში" დაადანაშაულეს.

ფოტოსესიისას კოლინსი ტრამპს ეკითხებოდა: "მიგაჩნიათ თუ არა, რომ ბატონმა [მაიკლ] კოენმა გიღალატათ?". მანამდე CNN-მა გამოაქვეყნა აუდიოჩანაწერი, რომელშიც, სავარაუდოდ, პრეზიდენტი და მისი ადვოკატი, მაიკლ კოენი Playboy-ს მოდელითვის, კარენ მაკდუგალისთვის ფულის გადახდას განიხილავენ. ფოტომოდელი ამტკიცებს, რომ ტრამპთან სექსუალური კავშირი ჰქონდა.

CNN-ის ჟურნალისტმა ტრამპს, ასევე, ჰკითხა რატომ არ იღებს ვლადიმერ პუტინი მის მოწვევას. აშშ-ის პრეზიდენტმა არც ერთ კითხვას არ უპასუხა.

ღონისძიების შემდეგ თეთრი სახლის კომუნიკაციის დეპარტამენტში კოლინს განუცხადეს, რომ ტრამპისა და იუნკერის 26 ივლისის პრესკონფერენციაზე დაშვებული არ იქნება.

პრეზიდენტის პრესსპიკერმა დაადასტურა, რომ კეიტლან კოლინსი მისი ქცევის გამო არ დაუშვეს. მან დაამატა, რომ ისინი მხარს უჭერენ თავისუფალ პრესას და ყველას სთხოვენ, რომ პრეზიდენტისა და მისი სტუმრების მიმართ მეტი პატივისცემა გამოიჩინონ.

სხვა ჟურნალისტები, რომლებიც იმ მომენტისთვის ოთახში იყვნენ, ყვებიან, რომ კოლინსის მოქმედებები უადგილო არ იყო. CNN-ის ერთ-ერთმა მთავარმა კონკურენტმა FoxNews-მა კი განმარტა, რომ კოლინსის არდაშვებას არ ეთანხმებიან და მას მხარდაჭერას უცხადებენ. თეთრი სახლის გადაწყვეტილება გააკრიტიკა თეთრი სახლის კორესპონდენტთა ასოციაციამ:

"თუ თეთრ სახლს არ სიამოვნებს კითხვები, რომლებიც დღის წესრიგში დგას, ეს არ ნიშნავს, რომ ისინი უადგილოა. ჟურნალისტის არდაშვების გადაწყვეტილება თავისი შინაარსით რეპრესიულია და არ შეესაბამება პრესის თავისუფლების პრინციპებს".