პრემიერ-მინისტრის, მამუკა ბახტაძის თქმით, ქვეყანაში ოპოზიციის ძირითადი ამოცანა ქართული ოცნების თავმჯდომარის, ბიძინა ივანიშვილის პიროვნული დისკრედიტაციაა. ამის შესახებ მამუკა ბახტაძემ ბიძინა ივანიშვილის სატელევიზიო ინტერვიუს შეფასების დროს განაცხადა.

"მიუხედავად იმისა, რომ ბიძინა ივანიშვილის ინტერვიუ იყო ძალზე კრიტიკული მთავრობის საქმიანობისადმი, კვლავაც გრძელდება ხელმოცარული და უპერსპექტივო ოპოზიციის მხრიდან პერსონალურად მის მიმართ იერიშების მიტანა", - განაცხადა ბახტაძემ.

ბახტაძის თქმით, პიროვნული თავდასხმები და შეურაცხყოფა არაკონსტრუქციული ოპოციზიის ძირითადი ხელწერაა და ოპოზიციის მხრიდან არ ჩანს შინაარსობრივი არგუმენტაცია იმაზე, თუ რატომ არ ეთანხმებიან ბიძინა ივანიშვილს.

ივანიშვილის პირველ სატელევიზიო ინტერვიუს პოლიტიკაში დაბრუნების შემდეგ, ოპოზიციაში აკრიტიკებენ და აცხადებენ, რომ ყოფილი პრემიერი და პარტიის ლიდერი ხელის შეწმენდას ყოფილ მაღალჩინოსნებზე ცდილობს.

ქართული ოცნების დამფუძნებელმა, ყოფილმა პრემიერ-მინისტრმა და ახლა უკვე ოფიციალურად გაფორმებულმა პოლიტსაბჭოს თავმჯდომარემ, ბიძინა ივანიშვილმა პოლიტიკაში დაბრუნების შემდეგ პირველი სატელევიზიო ინტერვიუ საზოგადოებრივ მაუწყებელს მისცა. ივანიშვილის ინტერვიუს დიდი ნაწილი ქვეყანაში არსებულ სიღარიბესა და დემოკრატიას შორის არაპროპორციულობასა და გიორგი კვირიკაშვილთან კონფლიქტს უკავშირდებოდა.

ამავე თემაზე: ივანიშვილის ინტერვიუს მთავარი აქცენტები - ერთად და მოკლედ