თუ საქართველოში მამა-შვილი ბაღაშვილი იყო პოპულარული, ოკეანის გადაღმა თაობათა ურთიერთობის ახალ ეტაპზე გადავიდნენ. მამები შვილებთან ერთად ჰელოუინზე პრინცესას ფორმებში გამოწყობილებიც დადიან და დუეტებსაც წერენ, თანაც ახერხებენ და ხშირად ცნობილ პოპ შემსრულებლებსაც კი ჯობნიან სხვადასხვა საიტებზე მნახველთა რაოდენობითა და მზარდი პოპულარობით.

მაგალითად ბენჯამენ აიმსისა და მისი 4 წლის ქალიშვილის ადელაიდას სიმღერამ “Tonight You Belong To Me“ ამ დრომდე 14 მილიონ ნახვაზე მეტი დააგროვა და ინტერნეტის სენსაციად იქცა.

ბენჯამენი პროფესიით ფიზიკოსია, თუმცა საკუთარ საქმიანობას მშვენივრად უთავსებს მუსიკას და რამდენიმე ინსტრუმენტზეც შესანიშნავად უკრავს. აღსანიშნავია ისიც, რომ ბენმა ჯილდოც კი მიიღო. მან შეიმუშავა მეთოდი, თუ როგორ შეიძლება გასაგებად ავუხსნათ მეცნიერული ფაქტები და მოვლენები ბავშვებს.

“ჩვენ ვცხოვრობთ პატარა სოფელში, ხშირად არ გვაქვს საშუალება რომ ყოველი დღე ან შაბათ-კვირა დღესასწაულად ვაქციოთ, სწორედ ამიტომ თავად გადავწყვიტე ჩემი ცხოვრებისთვის პატარა ფეიერვერკი შემემატებინა. ჩემი ერთ-ერთი საყვარელი ფილმი არის “The Jerk”, რომელიც გახდა ინსპირაცია ჩემს ქალიშვილთან დუეტი ჩამეწერა, ვიყიდე ახალი ვებ კამერა, გადავიღე ვიდეო და ავტვირთე youtube-ზე, ასეთ გამოხმაურებას არც ველოდი” - თქვა Good Morning America-სთან ინტერვიუს დროს ბენჯამენმა.

მიუხედავად იმისა რომ ხმა საერთოდ არ მაქვს და ჩემი მუსიკალური მონაცემებით ძირითადად მეზობლის ნერვებზე ვთამაშობ, შვილი რომ მყავდეს აუცილებლად ჩავწერდი მასთან ერთად დუეტს, ასე რომ სანამ დამისწრია, ჯობია არ დამელოდოთ და მარტივად და საყვარლად გახდეთ საერთაშორისო თუ არა ქართული ინტერნეტ სივრცის ვარსკვლავები.