ხორავას ქუჩის საქმეზე ცრუ ჩვენებისთვის ბრალდებულ არასრულწლოვანს აღკვეთის ღონისძიებად პატიმრობა შეეფარდა. დაცვის მხარე გირაოს შეფარდებას ითხოვდა, თუმცა სასამართლომ პროკურატურის შუამდგომლობა დააკმაყოფილა.

პროკურორის, თორნიკე ნადირაძის თქმით, არსებობს ჩანაწერები და მტკიცებულებები, რომ ბრალდებულმა ჩვენებები შეცვალა.

"აღნიშნული ქმედებით იგი ეცადა, რომ პასუხისმგებლობა აეცილებინა საკუთარი თავისთვის. ყველაზე მნიშვნელოვანი დეტალები ამოეგდო მის მიერ მიცემული ჩვენებიდან იმისათვის, რომ საბოლოო ჯამში არ ემხილებინა ის პირები, რომლებმაც შესაძლოა დაინახეს აღნიშნული ფაქტი", - განაცხადა პროკურორმა.

ბრალდებულის ადვოკატის თქმით, სასამართლომ ვერ დაასაბუთა რის გამო შეუფარდეს მისი დაცვის ქვეშ მყოფს პატიმრობა. მისივე თქმით, არასრულწლოვანი აღიარებს, რომ მოკლული დავით სარალიძის მამას, ზაზა სარალიძეს შეხვდა, თუმცა ბრალდების სხვა ნაწილს - არა.

19 ივლისს საქმეზე ცრუ ჩვენების მიცემის ბრალდებით არასრულწლოვანი დ.ღ. დააკავეს. შსს-ს ინფორმაციით, გამოძიებით დადგინდა, რომ დ.ღ.-მ, რომელიც უშუალოდ შეესწრო განსაკუთრებით მძიმე დანაშაულის ჩადენის ფაქტს, განზრახ არასწორი ინფორმაცია მიაწოდა სასამართლოს და მისცა ცრუ ჩვენება.