ტურიზმის ეროვნული ადმინისტრაციის ინფორმაციით, 2016 წლის ივლისის თვეში, საქართველოს 764 022 საერთაშორისო მოგზაური ეწვია, რაც წინა წლის ანალოგიურ პერიოდთან შედარებით 3,5%-ით, ანუ 26 124-ით მეტია.

ტურისტების რიცხვმა, რომლებმაც 24 საათი და მეტი დაჰყვეს საქართველოში, ივლისში 390 234 შეადგინა, რაც წინა წლის იფივე მაჩვენებელზე 15,8%-ით მეტია.

ტურიზმის ეროვნული ადმინისტრაციის ხელმძღვანელმა გიორგი ჩოგოვაძემ, 2 აგვისტოს სასტუმრო ბილტმორ თბილისში, ბოლო თვეების ტურიზმის სტატისტიკის პრეზენტაცია გამართა.

მისი განცხადებით, ტურისტების რაოდენობის შემოსვლის მხრივ პირველ სამეულში კვლავ რჩებიან სომხეთი და თურქეთი, ასევე, აზერბაიჯანი, რუსეთი და უკრაინა.

ფოტო: ტურიზმის ეროვნული ადმინისტრაცია

ტურიზმის ადმინისტრაციის ხელმძღვანელის განცხადებით, ქვეყანაში შემომსვლელთა განსაკუთრებული ზრდა დაფიქსირდა ირანიდან +575%, სირიიდან, +453%, ინდოეთიდან +368%, ეგვიპტიდან +263, და საუდის არაბეთიდან +112%.

სტატისტიკის თანახმად, ივლისის თვეში საქართველოში ევროკავშირის ქვეყნებიდან ჩამოსვლის კუთხით გამოირჩევა გერმანია, ლიტვა, საბერძნეთი და გაერთიანებული სამეფო.

ტურიზმის ადმინისტრაციის ინფორმაციით, 2016 წლის პირველი შვიდი თვის მონაცემებით, საერთაშორისო მოგზაურთა რაოდენობამ 3 400 335 შეადგინა, რაც წინა წლის ანალოგიურ მაჩვენებელთან შედარებით 10,6%-ით მეტია, ტურისტების რაოდენობამ კი 1 401 914 შეადგინა, რაც 208 436-ით(17,5%) მეტია წინა წელთან შედარებით.