11 ივლისს, 15:00 საათზე, ილიას სახელმწიფო უნივერსიტეტის E207 აუდიტორიაში, პასკალის პრემიის 2017 წლის გამარჯვებულთა დაჯილდოების ცერემონიალი გაიმართება.

პასკალის პრემიის 2017 წლის ლაურეატები არიან: გიორგი გვალია, ლაშა სუხიშვილი და ლევან მუმლაძე.

ახალგაზრდა მეცნიერთა კვლევის პროცესში ჩართულობის ხელშეწყობის მიზნით, ილიას სახელმწიფო უნივერსიტეტის რექტორის, გიგა ზედანიას ინიციატივით, 2014 წელს დაწესდა პასკალის პრემია - ფულადი ჯილდო, რომლის ოდენობა 3 000 ლარია.

პრემია გადაეცემა ილას სახელმწიფო უნივერსიტეტთან აფილირებულ ახალგაზრდა მეცნიერებს მნიშვნელოვანი საერთაშორისო პუბლიკაციისთვის, რომელსაც აქვს სტატიის სახე. ჯილდო ერთ კანდიდატზე გაიცემა წელიწადში მაქსიმუმ სამ სტატიაზე. პრემიის მიმღებთა რიცხვი შეზღუდული არ არის.

გიორგი გვალია ილიას სახელმწიფო უნივერსიტეტის პოლიტიკისა და საერთაშორისო ურთიერთობების მიმართულების პროფესორი, ასევე მეცნიერებათა და ხელოვნების ფაკულტეტის დეკანია. მან პრემია ჟურნალ Foreign Policy-ში გამოქვეყნებული სტატიისთვის მიიღო. სტატიის სახელია: Vodka or Bourbon? Foreign Policy Preferences Toward Russia and the United States in Georgia.

ლაშა სუხიშვილი ილიას სახელმწიფო უნივერსიტეტის დედამიწის შემსწავლელ მეცნიერებათა ინსტიტუტის მკვლევარი და გეოგრაფიის დეპარტამენტის უფროსია. მისი სტატია North Atlantic influence on Holocene flooding in the southern Greater Caucasus ჟურნალ The Holocene-ში გამოქვეყნდა.


ლევან მუმლაძე კი, ილიას სახელმწიფო უნივერსიტეტის საბუნებისმეტყველო მეცნიერებებისა და საინჟინრო ფაკულტეტის ასისტენტ-პროფესორია, რომელმაც პრემია ორი სტატიისთვის მიიღო.
პირველი სტატია Patterns of oribatid mite species diversity: testing the effects of elevation, area and sampling effort გამოქვეყნდა ჟურნალ Experimental and Applied Acarology-ში. მეორე სტატია Beyond elevation: testing the climatic variability hypothesis vs. Rapoport’s rule in vascular plant and snail species in the Caucasus სამეცნიერო ჟურნალ Biological Journal of the Linnean Society-ში გამოქვეყნდა.

დაჯილდოვების შესახებ დამატებითი ინფორმაციის მიღება ილიაუნის საიტზე შეგიძლიათ.