სამცხე-ჯავახეთის საოლქო პროკურატურამ ქრთამის შეთავაზების ბრალდებით ერთი პირი დააკავა. უწყების განცხადებით, მათ დაკავებულის მანქანა შეაჩერეს, რომლითად უკანონოდ მოპოვებული ხე-ტყის პირველადი გადამუშავების პროდუქტი გადაჰქონდა.

როგორც პროკურატურაში განმარტავენ, ამის შემდეგ დაკავებული შეხვდა შსს-ს სამცხე-ჯავახეთის პოლიციის დეპარტამენტის თანამშრომელს და უკანონოდ ტრანსპორტირების ხელშეწყობისთვის თანხა შესთავაზა. პროკურატურის განცხადებით, დაკავებული შსს-ს თანამშრომელს ბორჯომის რაიონიდან მის უსაფრთხო გაცილებასაც სთხოვდა.

საქმეზე გამოძიება საქართველოს სისხლის სამართლის კოდექსის 339-ე მუხლის მეორე ნაწილით მიმდინარეობს. ეს მუხლი სასჯელის სახით ითვალისწინებს თავისუფლების აღკვეთას 4-დან 7 წლამდე ვადით.