შინაგან საქმეთა სამინისტროს ცნობით, დღეს, 30 ივნისს, ახალი ამბების ერთ-ერთი სააგენტოს ჟურნალისტის მიმართვის საფუძველზე შპს ალბატროსის შენობის ჩხრეკა დაიწყო.

შსს-ში On.ge-ს უთხრეს, პირმა, რომელმაც მათ მიმართა, განაცხადა, რომ პროფესიული საქმიანობიდან გამომდინარე შეიტყო შპს ალბატროსის შენობის სხვენში ნარკოტიკული საშუალების არსებობის შესახებ.

შსს-ს განცხადებით, ჟურნალისტის მომართვიდან რამდენიმე საათში გადაუდებელი აუცილებლობით დასახელებულ კომპანიაში დაიწყო საგამოძიებო მოქმედებები.

კომპანია ალბატროსის იურისტი იასონ ბესელია მომხდარს "პროვოკაციას" უწოდებს და ამბობს, რომ ეს ყოფილი თანამშრომლის მიერ დაგეგმილი შურისძიებაა. იურისტის თქმით, სწორედ მათ მიიტანეს ნარკოტიკული საშუალებები, თვითონვე გაზარდეს და შეატყობინეს პოლიციას.

გამოძიება საქართველოს სისხლის სამართლის კოდექსის 265-ე მუხლით დაიწყო, რაც ნარკოტიკული საშუალების შემცველი მცენარის უკანონო დათესვა, მოყვანა ან კულტივირებას გულისხმობს.