"პოლიტიკურ სპეკულაციებთან გვაქვს საქმე", - ასე გამოეხმაურა საგარეო საქმეთა მინისტრი, დავით ზალკალიანი, ოთხოზორია-ტატუნაშვილის სიაში რუსეთის ფედერაციის მოქალაქეების არ შეყვანის საკითხს.

ზალკალიანის განცხადებით, ოთხოზორია-ტატუნაშვილის რეზოლუციის ტექსტში წინასწარ იყო განსაზღვრული თუ ვინ შევიდოდა სიაში. მისი თქმით, რეზოლუცია ეხებოდა:

  • მსჯავრდებულსა და ბრალდებულს;
  • პირს, ვის მიმართაც დაიწყო სისხლის სამართლის დევნა;
  • პირებს, ვინც ჩაიდინეს დანაშაული ოკუპირებულ ტერიტორიაზე.

"ყველა ეს კრიტერიუმი ამ სიით არის დაკმაყოფილებული, ამიტომ ეს არის საზოგადოების შეცდომაში შეყვანა. სია არ არის დახურული და მუდმივად ახლდება", - აცხადებს ზალკალიანი.

ევროპული საქართველოს დეპუტატმა სერგი კაპანაძემ განაცხადა, რომ საქართველოს მთავრობის მიერ წარმოდგენილი ოთხოზორია-ტატუნაშვილის სიაში, შეყვანილი არ არის რუსეთის მოქალაქეები და მოუწოდა მთავრობას, უფრო მეტი პასუხისმგებლობით მიუდგეს საკითხს.