საქართველოსა და ევროკავშირს შორის ასოცირების შეთანხმების ხელმოწერიდან 4 წელი შესრულდა. საგარეო საქმეთა სამინისტროს ინფორმაციით, ასოცირების შეთანხმების გაფორმებამ თვისობრივად ახალ ეტაპზე გადაიყვანა საქართველო-ევროკავშირის ურთიერთობები და დასაბამი დაუდო საქართველოს ევროკავშირთან პოლიტიკური ასოცირებისა და ეკონომიკური ინტეგრაციის პროცესს.

უწყების ცნობით, საქართველოში წარმოებული პროდუქციისათვის გაიხსნა 500 მილიონიანი ევროკავშირის ბაზარი, გაიზარდა საქართველო-ევროკავშირის სავაჭრო ურთიერთობები, მათ შორის გაიზარდა საქართველოს ექსპორტი ევროკავშირის წევრ ქვეყნებში.

"საქართველომ მნიშვნელოვან პროგრესს მიაღწია ევროკავშირთან საკანონმდებლო და ინსტიტუციური დაახლოების პროცესში, საქართველო გახდა ევროპის ენერგეტიკული გაერთიანების წევრი, საქართველოს მოქალაქეებისთვის ამოქმედდა უვიზო რეჟიმი ევროკავშირის/შენგენის ზონის ქვეყნებთან, საქართველომ დაიწყო მაღალი დონის სტრატეგიული დიალოგი ევროკავშირთან უსაფრთხოების საკითხებზე და სხვა", - ნათქვამია საგარეო საქმეთა სამინისტროს განცხადებაში.

განცხადებაში ვკითხულობთ, რომ ასოცირების შეთანხმებამ ხელო შეუწყო ევროკავშირის სტანდარტებთან დაახლოებას და ქვეყანაში ევროპული ფასეულობების დამკვიდრებას. განხორციელდა მნიშვნელოვანი რეფორმები ისეთ სფეროებში როგორებიცაა, ადამიანის უფლებების დაცვა, დემოკრატიული ინსტიტუტების განვითარება, კანონის უზენაესობა, ვაჭრობა და ვაჭრობასთან დაკავშირებული საკითხები, კორუფციასთან და ორგანიზებულ დანაშაულთან ბრძოლა, საზღვრის მართვა, ენერგეტიკა, სოფლის მეურნეობა, გარემოს დაცვა და სხვა.

საგარეო საქმეთა სამინისტროს ინფორმაციით, ასოცირების შეთანხმების ხელმოწერიდან დღემდე, საქართველომ 400 მილიონ ევრომდე ევროკავშირის ფინანსური დახმარება მიიღო.