დღეს, 25 ივნისს პრემიერ-მინისტრმა, მამუკა ბახტაძემ აღმოსავლეთ-დასავლეთის ჩქაროსნული ავტომაგისტრალის მონაკვეთი გახსნა.

ბახტაძის თქმით, ქობულეთის შემოვლითი გზის მეორე, 18-კილომეტრიანი მონაკვეთის მშენებლობა დასრულებულია. დღეიდან, სატრანზიტო მოძრაობა ქობულეთის ზღვისპირა ზოლიდან ახალ გზაზე გადაერთვება:

"ეს გახლავთ 32 კილომეტრიანი გზა ორი გვირაბითა და 15 ხიდით. მათ შორისაა, საქართველოში ყველაზე გრძელი ხიდი, რომლის სიგრძე, თითქმის, 1200 მეტრია".

ახალი, 18 კილომეტრიანი გზა ექსპლუატაციაში დღეიდან შევიდა.

ბახტაძის თქმით, ახალი გზა გაზრდის სატრანზიტო სატრანსპორტო მიმოსვლას და, მინიმუმ, 30 წუთით შეამცირებს თბილისიდან ბათუმამდე მგზავრობის დროს:

"შეამცირებს გადაზიდვის ხარჯებსა და გარემოზე მავნე ზემოქმედებას".

პრემიერ-მინისტრმა სიტყვით გამოსვლისას ყურადღება ქვეყნის მიერ განხორციელებულ ეკონომიკურ და სხვა ტიპის აქტივობებზე გაამახვილა.

ქობულეთის შემოვლითი გზის პირველი მონაკვეთის მშენებლობა 2014 წელს დასრულდა, პირველი და მეორე მონაკვეთები ჯამში 31,7 კილომეტრია.