საქართველოს ენერგეტიკის მინისტრი, ვიცე-პრემიერი კახა კალაძე ბოდიშის იხდის "ქალების ჭორიკნობასთან" დაკავშირებით მის მიერ ნათქვამი სექსისტური ფრაზის გამო. მან განმარტება ფეისბუკის პირად გვერდზე გამოაქვეყნა:

"ვაპირებდი რეგიონებიდან თბილისში დაბრუნებისთანავე გამეკეთებინა განმარტება ჩემს უნებურ, მექანიკურ ფრაზაზე ქალბატონების ჭორაობის შესახებ, რომელიც ცილისწამებაზე კომენტირებისას ვთქვი. მე ჯერაც გაბრაზებული და გაკვირვებული ვარ, იმ არაკორექტული და მიკერძოებული განცხადების გამო, პლუს გაბრაზებული და გულდაწყვეტილი, რომ წამომცდა ის რასაც არც ვფიქრობ, არც განვიცდი და არ არის ჩემი მსოფლმხედველობის ნაწილი.

გულწრფელად გეტყვით, იმდენად გამჯდარია მეტყველებაში ფრაზა - ქალები ჭორაობენ, რომ სხვა რამეზე კონცენტრირებულს წამომცდა. ვაღიარებ დანაშაულს!

ყოველთვის ქალების, გენდერული თანასწორობის დამცველი ვიყავი, ნეტავი სხვა რეალური პრობლემები არ იყოს ჩვენს ქვეყანაში ქალებთან დაკავშირებით და მხოლოდ პოლიტიკოსების და საჯარო პირების არაკორექტულად ან უნებურად ნათქვამი ხდებოდეს მსჯელობის ან კრიტიკის საგანი. იმედია, ეს დროც მალე მოვა. მე არც აქამდე ვაკლებდი ქალების უფლებების დაცვას ძალისხმევას, არც მომავალში ვიქნები პასიური ამ თემასთან მიმართებაში!".

კახა კალაძემ რამდენიმე დღის წინ სექსისტურად შეაფასა პრეზიდენტ გიორგი მარგველაშვილისა და საკონსტიტუციო სასამართლოს თავმჯდომარის, გიორგი პაპუაშვილის განცხადებები სამართალდამცავთა მხრიდან წამოსულ ზეწოლაზე: "მგონია, საქმე გვაქვს ჭორიკნობასთან, როდესაც ქალბატონები ჭორაობენ".