პარლამენტის თავმჯდომარის, ირაკლი კობახიძის განცხადებით, ახალ მთავრობაში შესაძლოა 14-ის ნაცვლად 11 მინისტრი იყოს, თუმცა მხოლოდ 10 სამინისტრო დარჩეს. კობახიძის განმარტებით დამატებითი უწყების შექმნას არ განიხილავენ და ახალი მინისტრი, რომელიმე სამინსიტროს ცალკეულ მიმართულებას უხელმძღვანელებს.

"საუბარია იმაზე, რომ მსხვილი სამინისტროების პირობებში ხომ არ არის მიზანშეწონილი მეორე დონის - მინისტრის მოადგილის დონის გამოკვეთა და მათთვის კონკრეტული მიმართულებების განსაზღვრა. ეს იყო ზოგადი ინიციატივა, რომელზეც მსჯელობა გრძელდება. რაიმე დამატებითი რგოლის გაჩენაზე მთავრობის სტრუქტურაში საუბარი არ არის."

კობახიძის განცხადებით, უმრავლესობაში კონსულტაციები გრძელდება და გადაწყვეტილებას დღეს, 23 ივნისს ან ხვალ მიიღებენ.

აქამდე გავრცელებული ინფორმაციით, მთავრობაში ახალი, სახელმწიფო მდივნის თანამდებობის შექმნის საკითხს განიხილავდნენ. ამის შესახებ ჟურნალისტებთან საუბრისას პარტიაში შეხვედრის შემდეგ ქართული ოცნების წევრმა, ზვიად კვაჭანტირაძემ განაცხადა.