სახელმწიფო აუდიტის სამსახური პრემიერ-მინისტრის, მამუკა ბახტაძის საბანკო ანგარიშიდან 2012 წელს ნაციონალური მოძრაობისთვის 20 000 ლარის გადარიცხვის საკითხს შეისწავლის. ამის შესახებ გენერალურმა აუდიტორმა, ირაკლი მექვაბიშვილმა განაცხადა.

"არსებობს კითხვები, არის მაღალი საზოგადოებრივი ინტერესი, არასამთავრობო სექტორმა ფორმალურად ოფიციალურად მოგვმართა. ჩვენ გავაკეთებთ ექსპერტიზას ამ საკითხის და პასუხს გავცემთ არგუმენტირებულად ჩვენი კომპეტენციის ფარგლებში", - ამბობს მექვაბიშვილი.

19 ივნისს ახლანდელმა საქართველოს პრემიერმა, მამუკა ბახტაძემ განაცხადა, რომ 2012 წლის აგვისტოში ნაცინალურ მოძრაობას "სხვისი ფული შეწირა". მისი განმარტებით, 2011 წლიდან ქართული ოცნების მხარდამჭერია და მისი პირად ანგარიში გადარიცხვისთვის ტექნიკურად გამოიყენეს.

სახელმწიფო აუდიტის სამსახურს საკითხის განხილვისთვის საერთაშორისო გამჭვირვალობა - საქართველომ მიმართა. მათი თქმით, იმის მიუხედავად, რომ ამ მუხლით 2012 წელს ჩადენილი დანაშაული დასჯადი აღარაა და შესაბამისი მუხლი ამნისტირებულია, უმაღლესი პოლიტიკური თანამდებობის პირის საქმეში მონაწილების გამო საკითხი მაინც შესასწავლია.