ხორავას ქუჩაზე მოკლული დავით სარალიძის მამა, ზაზა სარალიძე ამბობს, რომ პროკურატურის ყოფილი მაღალჩინოსანი მირზა სუბელიანი სასამართლო პროცესებზე მას უსამძიმრებდა და ბოდიშს უხდიდა.

"მირზა სუბელიანი იყო ჩემთან სახლში მოსული, ოღონდ ეს მოხდა მისი შვილის დაკითხვის შემდეგ. სასამართლო პროცესზე მომისამძიმრა და მომიბოდიშა. ბოდიში მოხდისა და მოსამძიმრებისთვის ჩემთან სახლში იყო, მე მაშინ არ ვიყავი, ჩემი ცოლი იყო. ბიბლია და ბავშვის სახელზე წმინდა გიორგის ხატი გადმოგვცა. იმ პერიოდში სანამ სახლში მოვიდოდა, ტელეფონზე მირეკავდა და მიბოდიშებდა, რომ, ალბათ, რაღაც შეცდომა დავუშვი ბავშვის აღზრდაშიო", - ამბობს სარალიძე საპარლამენტო კომისიის სხდომაზე.

სარალიძე მიიჩნევს, რომ სუბელიანის შვილი ხორავას ქუჩის საქმეში ერთ-ერთი დამნაშავეა. ასევე, ამბობს, რომ ყოფილი მაღალჩინოსნის ცოლის დიშვილი, მიხეილ კალანდია მისი შვილის მკვლელია.

სარალიძის თქმით, ხორავას ქუჩაზე მოზარდების შეკრების ორგანიზატორი მირზა სუბელიანის შვილი იყო.

მირზა სუბელიანი ხორავას ქუჩის საქმეზე დანაშაულის შეუტყობინებლობისთვის არის დაკავებული. მირზა სუბელიანისთვის წარდგენილი ბრალის თანახმად, პირველ დეკემბერს თბილისში, ხორავას ქუჩა #4-ის მიმდებარე ტერიტორიაზე ორი არასრულწლოვნის მკვლელობის შემდეგ მან გაიგო ერთ-ერთი არასრულწლოვნის, გ.ჯ.-ს დანაშაულის შესახებ და არ შეატყობინა სამართალდამცავ ორგანოებს.

გარდა ამისა, პატიმრობა შეეფარდა მერაბ მორჩაძეს, რომელიც მოწმის მოსყიდვაშია ბრალდებული.