დღეს, 20 ივნისს საქართველოს საკონსტიტუციო სასამართლოში განმწესრიგებელი სხდომა გაიმართა მეტამფეტამინის ნარჩენების საქმეზე. მოსარჩლეები ნოე კორსავა და გიორგი გამგებელი ნორმის არაკონსტიტუციურად გამოცხადებას ითხოვენ.

მათი განმარტებით, 0,00000126 გრამს და 0,0003 გრამს იწონის მეტამფეტამინის მოსახმარად გამოყენებულ შპრიცში დარჩენილი ანაფხეკები, რომელთა შეუიარაღებელი თვალით დანახვა, მით უფრო მათი მოხმარება, შეუძლებელია.

მოსარჩელეები მსჯავრდებულნი არიან დიდი ოდენობით (0,00000126 გრამი და 0,0003 გრამი) ნარკოტიკული საშუალება მეტამფეტამინის (მარილი) უკანონოდ შეძენისა და შენახვისთვის და შეფარდებული აქვთ 5 წლით თავისუფლების აღკვეთა, რაც ჩაეთვალათ პირობით.

მოსარჩელეთა განცხადებით, მეტამფეტამინს არ გააჩნია მცირე და სისხლისსამართლებრივი პასუხისმგებლობის საწყისი ოდენობები, რის გამოც, მისი ნებისმიერი ოდენობა, რომელიც არ აღემატება 1 გრამს დიდ ოდენობად არის მიჩნეული.

მოსარჩელეების განცხადებით, დასახელებული ოდენობების მეტამფეტამინის შეძენა და შენახვა არ არის საზოგადოებრივი საშიშროების მქონე ქმედებას, რის გამოც თავისუფლების აღკვეთის გამოყენება არაპროპორციული სასჯელია და ეწინააღმდეგება საქართველოს კონსტიტუციის მე-17 მუხლის მე-2 პუნქტს.

მოსარჩელეთა იურისტი, გიორგი გოცირიძე რადიო თავისუფლებასთან ინტერვიუში ამბობს, რომ მათი მოთხოვნაა საქმე არსებითად განსახილველად არ მიიღონ და ისე გამოაცხადონ გადაწყვეტილება. მისივე თქმით, ამის მიზეზი ის არის, რომ წარსულში საკონსტიტუციომ იმსჯელა მსგავს შემთხვევაზე, როდესაც მოხმარებისთვის გამოუსადეგარი დეზომორფინის შენახვაზე თავისუფლების აღკვეთის გამოყენება არაპროპორციულ სასჯელად დაადგინა.