NDI-ის მიერ ჩატარებული საზოგადოებრივი კვლევის შეკითხვას, ძირითადად რომელი წყაროდან იღებთ ხოლმე ინფორმაციას პოლიტიკისა და მიმდინარე მოვლენების შესახებ, მოსახლეობის 77 პროცენტმა უპასუხა, რომ ინფორმაციის პირველი წყარო ტელევიზიაა, 14-მა პროცენტმა კი განაცხადა, რომ ინფორმაციას ინტერნეტიდან იღებს. ამასთან, ტელევიზია ინფორმაციის მეორე წყაროდ მოსახლეობის 12 პროცენტისთვის სახელდება, 22 პროცენტისთვის კი ინფორმაციის მეორე წყარო ინტერნეტია.

გამოკითხულთა 3 პროცენტი ამბობს, რომ მისთვის ინფორმაციის პირველწყარო მეზობლები და მეგობრები არიან, 19 პროცენტისთვის კი ისინი ინფორმაციის მეორე წყაროს წარმოადგენენ. ამასთან, გამოკითხულთა 2-2 პროცენტი ამბობს, რომ მისთვის ინფორმაციის პირველი წყარო ოჯახის წევრები, ჟურნალ-გაზეთები ან რადიოა.

ინფორმაციის მეორე წყაროდ ოჯახის წევრებს გამოკითხული მოსახლეობის 9 პროცენტი ასახელებს, ხოლო10 პროცენტისთვის მეორე წყარო ჟურნალ-გაზეთებია.

აღსანიშნავია, რომ გამოკითხულთა 25 პროცენტი ინფორმაციას ერთი და იმავე წყაროდან იღებს.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.