NDI-ის საზოგადოებრივი აზრის კვლევის მიხედვით, გამოკითხულთა 45 პროცენტს, რომელმაც უკვე გააკეთა არჩევანი საპარლამენტო არჩევნებისთვის, მიაჩნია, რომ ინფრასტრუქტურასთან დაკავშირებით გზების პრობლემა უპირველესია. ამავე პრობლემაზე საუბრობს გამოკითხულთა 49 პროცენტი, რომელსაც არჩევანი ჯერ არ გაუკეთებია.

გადაწყვეტილ ამომრჩეველთა 20 პროცენტი ფიქრობს, რომ გაზმომარაგება ჯერ კიდევ არ მოგვარებულა ქვეყანაში. გაზმომარაგებას ასახელებს პრობლემად გადაუწყვეტელი ამომრჩევლის 26პროცენტი.

წყალმომარაგება არის ის პრობლემა, რომელიც 17 პროცენტს აწუხებს, მათ ვინც საპარლამენტო არჩევნებისთვის გადაწყვეტილება უკვე მიიღო, ხოლო ამავე პრობლემაზე მოსაუბრე 21 პროცენტს ჯერ კიდევ არ გადაუწყვეტია ვის მისცემს ხმას.

გარემოს დაბინძურებას პრობლემად ასახელებს გადაწყვეტილი ამომრჩევლის 20 პროცენტი, ხოლო იგივე საკითხს პრობლემურად მიიჩნევს გადაუწყვეტელი ამომრჩევლის 17 პროცენტი.

NDI-ის გამოკითხვა 2016 წლის 8 ივნისიდან 6 ივლისის პერიოდში, საქართველოს მასშტაბით 4 113 პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობას შორის ჩატარდა. კვლევაში საშუალო ცდომილების ზღვარი არის +/- 2,1%.

კვლევას აფინანსებს შვედეთის საერთაშორისო თანამშრომლობის განვითარების სააგენტო (SIDA) და ატარებს CRRC-საქართველო.