პარტია გირჩის ლიდერი, ზურაბ ჯაფარიძე სტრასბურგის ადამიანის უფლებათა დაცვის სასამართლოში გაასაჩივრებს სააპელაციოს გადაწყვეტილებას. სასამართლომ არ დააკმაყოფილა ზურაბ ჯაფარიძის სარჩელი და ძალაში დატოვა საქალაქო სასამართლოს დადგენილება, რომლის მიხედვით მას 2 000-ლარიანი ჯარიმის გადახდა დაეკისრა. საქმეს მოსამართლე ლევან მურუსიძე განიხილავდა.

ზურაბ ჯაფარიძის განცხადებით, ის საქმის სტრასბურგის სასამართლოში გასაჩივრებას გეგმავს:

"მურუსიძემ ძალაში დატოვა პირველი ინსტანციის გადაწყვეტილება, რომელიც ეფუძნება მხოლოდ პოლიციელების ცრუ ჩვენებებს, თითქოს მე ვაგინე და ვეჭიდავე პოლიციელებს - და დამაკისრა 2 000-ლარიანი ჯარიმის გადახდა. შემდეგი გაჩერება - სტრასბურგი. პროკურატურაში შეტანილი მაქვს საჩივარი იმ პოლიციელების წინააღმდეგ, რომლებმაც მისცეს ცრუ ჩვენებები. ჯერჯერობით დუმილია. არ გადავიხდი".

საქმე ეხება 3 მაისს მომხდარ ინციდენტს, როდესაც პარტიის 3 ლიდერი ზურაბ ჯაფარიძე, იაგო ხვიჩია და ვახტანგ მეგრელიშვილი პოლიციისთვის წინააღმდეგობის გაწევისა და ხულიგნობის მუხლებით დააკავეს. მაშინ მეგრელიშვილსა და ხვიჩიას სასამართლომ 10-10 დღიანი პატიმრობა შეუფარდა, ხოლო ჯაფარიძეს 2 000-ლარიანი ჯარიმის გადახდა დაეკისრა.

გირჩის წევრები 2 მაისს, მას შემდეგ დააკავეს, რაც ქუჩაში მოქალაქის დაკავება გააპროტესტეს და სამოქალაქო ფორმაში ჩაცმულ პოლიციელებს წინააღმდეგობა გაუწიეს. გირჩის წევრების თქმით, პოლიცია მოქალაქეს უხეშად ეპყრობოდა. პოლიციამ ბრალდებული განყოფილებაში გადაიყვანა, სადაც გირჩის წევრებმა აქცია გამართეს მისი გათავისუფლების მოთხოვნით.