Reuters-ის ინფორმაციით, თურქეთში 15 ივლისს მომხდარი სახელმწიფო გადატრიალების მცდელობის ბრალდებით კიდევ 2 თურქი გენერალი დააკავეს, რომლებიც ავღანეთის ბაზაზე მუშაობდნენ. დაკავებული ჯაჰიტ ბაკირი ავღანეთში განლაგებული ნატოს თურქული ჯარების ხელმძღვანელი იყო, შენერ ტოპუჯი კი ქვეყნის განათლებასა და დახმარების საკითხებზე მუშაობდა.

გარდა ამისა, Reuters-ის ცნობით, ადგილობრივი Andy-Ar-ის სოციოლოგიური გამოკითხვის შედეგად გაირკვა, თურქეთის მოსახლეობის ორი მესამედი მიიჩნევს, რომ სახელმწიფო გადატრიალების მცდელობის უკან აშშ-ში მცხოვრები ფეტულა გიულენი დგას.

კერძოდ, გამოკითხული მოსახლეობის 64,4 პროცენტი თვლის, რომ მომხდარის უკან გიულენი დგას, 3,8 პროცენტის მიაჩნია, რომ ამბოხის ამერიკის შეერთებული შტატების მოწყობილია, 3,6 პროცენტი ამბობს, რომ გადატრიალების მცდელობა უცხოურ ძალებს ჰქონდათ, 2,2 პროცენტი კი მიიჩნევს, რომ მომხდარი თავად პრეზიდენტმა, რეჯეპ ტაიპ ერდოღანმა მოაწყო.

ამასთან, 25 ივლისს თურქეთის ხელისუფლებამ 42 ჟურნალისტის დაკავების ორდერიც გასცა. ბრძანება მას შემდეგ გაიცა, რაც თურქეთის პრეზიდენტმა, რეჯეპ ტაიპ ერდოღანმა ქვეყნის მასშტაბით ე.წ. წმენდის შესახებ გამოაცხადა და თანამდებობიდან გადააყენა ის პირები, რომლებიც ე.წ. "პარალელური სტრუქტურის" წევრები არიან. თურქეთის ხელისუფლება ამტკიცებს, რომ მოქალაქეთა აღნიშნული ჯგუფი აშშ-ში მცხოვრებ ფეტულა გიულენთან არის კავშირში.

15 ივლისს თურქეთში ხელისუფლების დამხობის მიზნით ქვეყნის რამდენიმე ლოკაციაზე შეიარაღებული დაჯგუფების თავდასხმას 300-მდე ადამიანის სიცოცხლე ემსხვერპლა, აჯანყებასთან კავშირის ბრალდებით თანამდებობიდან გადააყენეს და დააკავეს ათასობით მოსამართლე, მაღალი თანამდებობაზე მყოფი სამხედროები, პოლიციელები და სამოქალაქო პირები.

თურქეთში მომხდარის შესახებ დეტალური ინფორმაცია შეგიძლიათ იხილოთ აქ: