მარნეულში მომხდარი ძალადობის ფაქტზე, პროკურატურა წერს, რომ პირს, რომელმაც მარნეულის მერსა და ბიძინა ივანიშვილს აგინა, მარნეულის მერმა თემურ აბაზოვმა ელჩინ ალახვერდიევს სახეში შეაფურთხა და მიაყენა ფიზიკური შეურაცხყოფა:

"[აბაზოვმა] შემდეგ აიძულა ჩართულიყო ფეისბუქის პირდაპირ ეთერში, მოეხადა ბოდიში და სიტყვიერი შეურაცხყოფა მიეყენებინა საკუთარი ცოლისთვის. ბოლოს კი მარნეულის მუნიციპალიტეტის მერმა თემურ აბაზოვმა ძალადობით, ღირსების შელახვის მუქარით, ელჩინ ალახვერდიევი აიძულა მოეშარდა ჭიქაში და შარდით მოებანა სახე".

ამ ფაქტის ამსახველი ვიდეომასალა სტუდია მონიტორმა გუშინ, 12 ივნისს გაავრცელა, თუმცა კადრებში არ ჩანს, ვინ არის მოძალადე.

პროკურატურის ვერსიით, აღნიშნული პირი აბაზოვთან შესახვედრად მარნეულის საკრებულოს წევრებმა ჯეიხუნ ჩოიდაროვმა და რამინ ალახვერდიევმა წაიყვანეს.

ბრალდებაში ნათქვამია, რომ მანამდე, მას დაუკავშირდა პარტია ერთიანი ნაციონალური მოძრაობის წევრი, რაგიმ ასკეროვი, რომელმაც სთხოვა შეხვედრა. ასკეროვის მოთხოვნით ისინი შეხვდნენ ერთმანეთს პარტია ოფისში, სადაც იმყოფებოდნენ პარლამენტის წევრი ერთიანი ნაციონალური მოძრაობიდან აზერ სულეიმანოვი, მარნეულის საკრებულოს წევრი, პარტია ქართული ოცნებიდან რამინ ალახვერდიევი, მარნეულის მუნიციპალიტეტის მერის ნათესავი ე.გ და სხვა პირები.

10 ივნისს, ელჩინ ალახვერდიევი იმყოფებოდა თბილისში, რუსთაველის გამზირზე გამართულ საპროტესტო აქციაზე, სადაც მარნეულის მერზე, თემურ აბაზოვზე განაწყენებულმა, ფეისბუქის მეშვეობით აბაზოვის მეუღლეს მიაყენა სიტყვიერი შეურაცხყოფა.