ჩრდილოეთ კორეის ლიდერთან, კიმ ჩენ ინთან შესახვედრად აშშ-ის პრეზიდენტი დონალდ ტრამპი სინგაპურში უკვე ჩავიდა.

თვითონ ისტორიული სამიტი სამშაბათს, 12 ივნისს კუნძულ სენტოსაზე ჩატარდება, სადაც სამიტისთვის ბოლო სამზადისი მიმდინარეობს. ასევე, არ გამორიცხავენ, რომ ლიდერები ერთმანეთს სამიტამდე შეხვდებიან.

ეს იქნება ჩრდილოეთ კორეის ლიდერისა და აშშ-ის მოქმედი პრეზიდენტის პირველი შეხვედრა.

სინგაპურში გამგზავრებამდე ტრამპმა შეხვედრას "მშვიდობის დამყარების უნიკალური მცდელობა" უწოდა.

კიმ ჩენ ინი დონალდ ტრამპამდე სინგაპურში რამდენიმე საათით ადრე ჩაფრინდა და ქვეყნის პრემიერ-მინისტრს შეხვდა.

ფოტო: Vivian Balakrishnan / Twitter

ვაშინგტონი იმედოვნებს, რომ ტრამპისა და კიმის შეხვედრა სათავეს დაუდებს ჩრდილოეთ კორეის ბირთვულ განიარაღებას.

24 მაისს ამერიკის პრეზიდენტმა, დონალდ ტრამპმა, ჩრდილოეთ კორეის ლიდერთან, კიმ ჩენ ინთან დაგეგმილი შეხვედრა გააუქმა.

შეხვედრის გაუქმების მიზეზად დონალდ ტრამპმა კიმ ჩემ ინის ბოლოდროინდელი განცხადებები დაასახელა. მან, ასევე, მადლობა გადაუხადა ჩრდილოეთ კორეის ლიდერის ამერიკელი მძევლების გათავისუფლებისთვის და მწუხარებით აღნიშნა, რომ მსოფლიომ დაკარგა კიდევ ერთი შანსი დამყარებულიყო მშვიდობა.

ბოლო თვეების განმავლობაში, ჩრდილოეთ კორეის ლიდერის რიტორიკა დასავლეთის მიმართ საგრძნობლად შერბილდა, გაიმართა კიმ ჩენ ინის და სამხრეთ კორეის ლიდერის ისტორიული შეხვედრა და ბოლო დაედო ტექნიკური ომის მდგომარეობს ორ კორეას შორის. ამ შეხვედრიდან მალევე ჩრდილოეთ კორეაში საიდუმლო ვიზიტით იყო აშშ-ს სახელმწიფო მდივანი, მაიკლ პომპეო. სწორედ ამ ვიზიტიდან მალევე, ცნობილი გახდა, რომ სინგაპურის სამიტის ფარგლებში შედგებოდა დონალდ ტრამპისა და კიმ ჩენ ინის შეხვედრა.