საქართველოს პრემიერ-მინისტრის, გიორგი კვირიკაშვილის განცხადებით, 2018 წლის მიმდინარე პერიოდში ფიქსირდება მნიშვნელოვანი ეკონომიკური ზრდა. პრემიერის ინფორმაციით, 2018 წლის აპრილის თვის ეკონომიკური ზრდის მაჩვენებელი, 6,5 პროცენტს შეადგენს.

"ეს არის ბოლო წლების განმავლობაში ყველაზე მაღალი მაჩვენებელი, როგორც ყოველთვიურ, ისე კვარტალურ ჭრილში", - აცხადებს პრემიერი.

მისივე თქმით, მიმდინარე წლის პირველი 4 თვის ეკონომიკური ზრდის საშუალო მაჩვენებელი კი, 5,5 პროცენტს შეადგენს.

"ძალიან მნიშვნელოვანია, რომ ეკონომიკურ ზრდაში წარმმართველი როლი კერძო სექტორს უჭირავს. ბოლო წლების მსგავსად, 2018 წლის პირველ კვარტალშიც ნარჩუნდება საკმაოდ პოზიტიური ტენდენციები ბიზნეს სექტორში ბრუნვის, გამოშვების და დასაქმების ზრდის მიმართულებით", - აცხადებს გიორგი კვირიკაშვილი

მისი სურვილია, ზრდის მაჩვენებელი გაცილებით უფრო მაღალი იყოს მცირე და საშუალო ბიზნესში, ვინაიდან პრემიერის აზრით, სწორედ ეს მიმართულება აგრძნობინებს მოსახლეობის ფართო ფენებს ეკონომიკური ზრდის შედეგებს.

პრემიერის თქმით, გამოშვების ზრდა ფიქსირდება, ბევრ სექტორში, რაც ტურისტების გაზრდილი რაოდენობის შედეგია.

"ტურიზმის მზარდი ტენდენციები ყველაზე მეტად აისახება მოსახლეობის ფართო ფენებზე. რა თქმა უნდა, სახელმწიფო მაქსიმალურად შეეცდება, რომ ამ მიმართულებით მეტი ძალისხმევა დახარჯოს", - აცხადებს კვირიკაშვილი.

მისი თქმით, ძალიან მნიშვნელოვანია, მოსახლეობამდე ინფორმაცია სწორად იყოს მიტანილი რომ ეს არ არის მხოლოდ ციფრები.

"ეს არის კონკრეტულ ადამიანებსა და კონკრეტულ კომპანიებზე ასახული პოზიტიური ტენდენციები. რა თქმა უნდა, საქართველოში დღეს ყველა დალხენილი არ არის. მე როდესაც ამ ციფრებზე ვსაუბრობ ხოლმე, ყოველთვის ვფიქრობ, თუ რამდენად რთულია იმ ადამიანისთვის, რომელსაც ჯერ კიდევ ძალიან უჭირს ამ ციფრების მოსმენა", - აცხადებს პრემიერი.

მისი თქმით, ქვეყანამ გამოიარა 2014 წლის უმძიმესი კრიზისი, რომელიც გამოწვეული იყო უკრაინაში საომარი მოქმედებებითა და ოკუპაციით: "ასევე, სირიაში კრიზისი, რომელიც რეგიონზე აისახა, აისახა ჩვენს უმსხვილეს სავაჭრო პარტნიორებზე, აისახა დევალვაციაში"

"ჩვენ არა მხოლოდ დავძლიეთ კრიზისის ეფექტი, არამედ მნიშვნელოვან პოზიტიურ ტენდენციაში მოვახდინეთ ამ კრიზისის ტრანსფორმაცია", - განაცხადა პრემიერმა.

მისი თქმით, საქართველოში სიღარიბე დასაძლევია.

"ამას კიდევ არაერთი წელი დასჭირდება და ეს სიმართლეა, თუმცა ის ტენდენცია, რომელიც ჩვენ გვაქვს აღებული, არის რეცეპტი და გზა, სიღარიბის დაძლევისა", - აცხადებს პრემიერი.