სახალხო დამცველმა ნინო ლომჯარიამ განაცხადა, რომ ხორავას ქუჩაზე მომხდარი მოზარდების მკვლელობის საქმეზე გარკვეული გავლენები და [გამოძიების პროცესში] არასწორი ჩარევები იკვეთება:

"არ გამოვრიცხავ ნაწილობრივ არაპროფესიონალიზმსაც".

ამის შესახებ ნინო ლომჯარიამ ტვ პირველის ეთერში, გადაცემა პოლიტმეტრში ისაუბრა. მისი ვარაუდები გამოძიების იმ მასალებს ეყრდნობა, რასაც ომბუდსმენის ოფისი შინაგან საქმეთა სამინისტროში ეცნობა.

სახალხო დამცველის თქმით, ის ვერ დაადგენს მკვლელის ვინაობას და ვერ ჩაატარებს გამოძიებას, თუმცა ისინი გამოაქვეყნებენ გარკვეულ დასკვნებს გამოძიების მიმდინარეობის შესახებ:

"ამ ეტაპზე, ზოგადი ინფორმაცია ეხება გარკვეული საგამოძიებო მოქმედებების ჩაუტარებლობას, როცა საჭირო იყო, გარკვეული მასალების და მტკიცებულებების ამოუღებლობას, არასათანადოდ საქმის მასალების ჩაკერებას ან ამოღებას, ასევე, ჩვენებებს, რომლებიც ნამდვილად იძლეოდა განგაშის საშუალებას და ამ მიმართულებით ან ზედაპირული იყო დაკითხვა, ან საერთოდ არ წარიმართა".

ლომჯარია აღნიშნავს, რომ ხორავას საქმის უკან შეიძლება იყვნენ არამარტო ის ადამიანები, ვისი გვარებიც ბოლო პერიოდში გაჟღერდა.

ომბუდსმენის ცნობით, ის რამდენიმე დღეში გეგმავს ბრიფინგის გამართვას, სადაც საზოგადოებას წარუდგენს დასკვნას, იყო თუ არა ხარვეზები ხორავას საქმის გამოძიებაში.