მაგდა პაპიძემ, რომელიც შვილისა და ქმრის მკვლელობისთვის არის დაპატიმრებული, სტრასბურგის სასამართლოს მიმართა. მსჯავრდებული დაკავების დროს პოლიციელების მხრიდან არასათანადო მოპყრობის შესაძლო ფაქტებზე, გამოძიების გაჭიანურებასა და არაეფექტურობაზე საუბრობს. პაპიძის ინტერესებს ადამიანის უფლებათა ცენტრი დაიცავს, მათვე გაავრცელეს აღნიშნული ინფორმაცია.

ადამიანის უფლებათა ცენტრის მიერ გავრცელებული განცხადების მიხედვით, მაგდა პაპიძე ადამიანის უფლებათა ევროპულ სასამართლოს მიმართავს, დაადგინოს საქართველოს სახელმწიფოს მხრიდან ადამიანის უფლებათა ევროპული კონვენციის მე-3 (წამების აკრძალვა) და მე-14 (დისკრიმინაციის აკრძალვა) მუხლების დარღვევა.

"2015 წლის 19 დეკემბერს, დაკავებისას და მის შემდეგ, მაგდა პაპიძე სასტიკად იქნა ნაწამები დიდი დიღმის რაიონული პოლიციის თანამშრომლების მიერ. დაკავებისას მაგდა პაპიძე ორსულად იყო. ცემა-წამების შედეგად, მას ორსულობა შეუწყდა", - წერია საჩივარში.

2015 წლის 22 დეკემბერს პროკურატურამ დაიწყო გამოძიება სისხლის სამართლის კოდექსის 333-ე მუხლის მე-3 ნაწილის "ბ" ქვეპუნქტით, რაც სამსახურებრივი ძალადობით ან იარაღის გამოყენებით უფლებამოსილების გადამეტება გულისხმობს. 2016 წელს გამოძიება შეწყდა.

ცენტრის განცხადებით, გამოძიებამ არ ჩაატარა მსხვერპლის მიერ დასახელებული შესაძლო დამნაშავე პირების ამოცნობის პროცედურა, მიუხედავად იმისა, რომ განმცხადებელმა დეტალურად აღწერა მასზე მოძალადე პოლიციელები.

"გამოძიებამ არ ჩაატარა ექსპერტიზა შესაძლო ფეხმძიმობის მოშლისა და სექსუალური ძალადობის ფაქტის დადგენის თაობაზე. მაგდა პაპიძეს არ მიანიჭეს დაზარალებულის სტატუსი, რითაც წაერთვა საქმის მასალების გაცნობის შესაძლებლობა", - ვკითხულობთ საჩივარში.

2016 წლის 4 ივლისს ნაფიც მსაჯულთა სასამართლომ მაგდა პაპიძე დამნაშავედ სცნო ქმრისა და შვილის მკვლელობაში. 2016 წლის 6 ივლისს, თბილისის საქალაქო სასამართლომ მას უვადო თავისუფლების აღკვეთა მიუსაჯა.