ე.წ. ისლამურმა სახელმწიფომ ათეულობით ადამიანის მკვლელობასა და ქაბულში განხორციელებულ ტერაქტზე პასუხისმგებლობა აიღო. ინფორმაციას CNN ავრცელებს.

დღეს ავღანეთის დედაქალაქის ქუჩებში უმცირესობის წარმომადგენელი ჯგუფი მშვიდობიან დემონსტრაციას ატარებდა, როდესაც მათ შორის მყოფმა ორმა ტერორისტმა თავი აიფეთქა.

ბოლო ცნობებით დაღუპულია 61, ხოლო დაშავებულია 207 ადამიანი.

"დავინახე, რომ ათობით ადამიანი ჩემს გარშემო სისხლში იწვა და ასობით მათგანი გარბოდა" - ამბობს ავღანელი ჟურნალისტი ფატიმა ფაიზი.

ქვეყანაში განხორციელებულ უკანასკნელ ტერაქტებზე აქამდე პასუხისმგებლობას თალიბანი იღებდა, თუმცა მათ დღეს განაცხადეს, რომ აღნიშნულ ტერორისტულ აქტთან კავშირი არ ჰქონდათ. მოგვიანებით ISIS-ის მიერ მართულ მედიაში ე.წ. ისლამურმა დაჯგუფებამ ტერაქტზე პასუხისმგებლობა აიღო.

აფეთქების დროს, შიიტების უმცირესობის ჯგუფის ჰაზარას წევრები ავღანეთის პარლამენტის შენობასა და ქაბულის უნივერსიტეტის მშვიდობიან მსვლელობას მართავდნენ.

3 კვირის წინ, თალიბანის 2-მა თვითმკვლელმა ტერორისტმა ქაბულში, უნივერსიტეტის ახალდამთავრებული პოლიციელების ავტობუსში თავი აიფეთქეს, რასაც 34 ადამიანი ემსხვერპლა.