პარლამენტის თავჯდომარემ, დავით უსუფაშვილმა გადაცემა მაესტროს ფაქტორში განაცხადა, რომ რესპუბლიკელები კოალიცია ქართულ ოცნებაში იყვნენ იმ პარტნიორულ ურთიერთობებზე დაყრდნობით, რაც მათ ბიძინა ივანიშვილმა შესთავაზა და განმარტა, რომ კოალიციაში ყოველთვის იყვნენ ადამიანები, ვისთვისაც მიუღებელი იყო ის, რასაც მისი პარტია წლების განმავლობაში აკეთებდა:

"თუ ვინმეს რამე აქვს სათქმელი, ან ვინმეს ზემოდან დახედვის განცდების მსგავსი აწუხებს, გვესაუბროს ბიძინა ივანიშვილის ფაქტორის გარეშე. რესპუბლიკური პარტია არცერთ ეტაპზე, არც კოალიციის ლიდერთან ან კოალიციის სხვა პარტნიორებთან, ხელგაწვდილი არ მისულა, იქნებ სადმე წაგვიყვანოთო. პარტია თავად ბიძინა ივანიშვილმა მიიწვია პარტნიორად ძალიან მძიმე საქმეში. კოალიცია შეიქმნა სააკაშვილის საწინააღმდეგო ლაშქრად და ეს იყო იმ მომენტისთვის სწორი ნაბიჯი".

მან განმარტა, რომ ყველა იმ რეფორმის განხორციელებისთვის, რომელიც დღე ქვეყანას სჭირდება, საჭიროა პოლიტიკური კონსენსუსი, მრავალპარტიული ძალა, რომელიც თანმიმდევრობით გააგრძელებს წინსვლას საპენსიო რეფორმის, თვითმმართველობის რეფორმის საკითხებში:

"თუნდაც დასავლეთი და ნატო რომ გვინდა, იქაც არის საკითხები, რომელთაც დღეს რომ დავიწყებთ, რვა, ცხრა წლის მერე დასრულდება. ჩემი და რესპუბლიკელების მოგონილი არაა მრავალპარტიულობა. გვინდა დემოკრატია? გადავიხედოთ იქ სადაც დემოკრატიაა".

უსუფაშვილმა ასევე განაცხადა, რომ ამ ეტაპზე ქვეყნისთვის მთავარი ისაა, თუ როგორ განვითარდება მოვლენები საპარლამენტო არჩევნების დროს:

"ახლა ჩვენ უკვე ვსაუბრობთ მომავალ არჩევნებზე, იმაზე თუ რამდენ ხმას მიიღებენ რესპუბლიკელები, რამდენ დეპუტატს შევიყვანთ პარლამენტში, რამდენად გავლენიან ძალად ჩამოვყალიბდებით, ვისთან შევძლებთ საერთო ენის გამოძებნას სახელისუფლებო კოალიციაში ყოფნისთვის, ხოლო თუ ეს არ მოხერხდა, რამდენად ეფექტური ვიქნებით ოპოზიციაში".