ქართული ოცნების წევრის, ლევან გოგიჩაიშვილის თქმით, სირიასთან და მის მმართველ რეჟიმთან თანამშრომლობა შეუძლებელია. ამის შესახებ მან პარლამენტის სხდომაზე სირიის მიერ საქართველოს ოკუპირებული ტერიტორიების აღიარებასთან დაკავშირებით საუბრისას თქვა.

"ჩვენ რაც არ უნდა გვემუშავა, რას ველოდებოდით ასადის რეჟიმისაგან? ეს ადამიანები ვალდებულები არიან რუსეთის წინაშე. ადამიანი, რომელიც საკუთარ მოსახლეობას წამლავს, საკუთარი ბავშვები გამოჰყავს იმ ადგილებიდან, სადაც დაბომბვებს ეფარებიან, გაზი ჩააქვთ და ადამიანებს ხოცავენ. რა გზებით უნდა გვემუშავა ამ რეჟიმთან? ეს არის რეჟიმი, რომელიც საკუთარ მოსახლეობას ხოცავს", - განაცხადა გოგიჩაიშვილმა.

გუშინ, 29 მაისს სირიამ რუსეთისგან ოკუპირებული სამხრეთ ოსეთისა და აფხაზეთი დამოუკიდებელ რესპუბლიკებად აღიარა. ამ მიზეზით საქართველომ სირიასთან დიპლომატიური ურთიერთობები გაწყვიტა.

როგორც საქართველოს საგარეო საქმეთა სამინისტროში განაცხადეს, აღნიშნული ქმედებით ასადის რეჟიმმა მხარი დაუჭირა რუსეთის ფედერაციის მიერ საქართველოს წინააღმდეგ განხორციელებულ სამხედრო აგრესიას.