პარტია ევროპული საქართველო საგარეო საქმეთა მინისტრს მიხეილ ჯანელიძეს პარლამენტში იბარებს. ამის შესახებ ევროპული საქართველოს დეპუტატმა, სერგი კაპანაძემ სირიის მიერ საქართველოს ოკუპირებული ტერიტორიების სახელმწიფოებად აღიარების შემდეგ On.ge-ს განუცხადა.

მისი თქმით, საგარეო უწყების მინისტრი ვალდებულია მივიდეს პარლამენტში და არაღიარების პოლიტიკასთან დაკავშირებით არსებულ კითხვებს პასუხი გასცეს.

სერგი კაპანაძის თქმით, სირიის მიერ საქართველოს ოკუპირებული ტერიტორიების აღიარებით, რუსეთი აგრძელებს, თავისთვის მეგობრული რეჟიმების მეშვეობით, საქართველოს ტერიტორიული მთლიანობის ხელყოფას.

"სირიის გადაწყვეტილებით კიდევ ერთხელ ნათლად გამოჩნდა, რომ მიდგომა რუსეთის მიმართ, რომ ისინი ჩვენი მეგობრები არიან, კონტრპროდუქტიულია. ამით ხდება ჩვენი მეგობრების მოდუნება. ეს ემსახურება ილუზიის შექმნას, რომ რაღაც გვარდება", - განაცხადა სერგი კაპანაძემ.

დეპუტატის თქმით, ყველაზე ცუდ დროსაც კი, როცა ასადის ფიზიკური გადარჩენა დამოკიდებული იყო რუსეთზე, სირიას არ უღიარებია აფხაზეთისა და სამხრეთ ოსეთის დამოუკიდებლობა. მისი თქმით, ეს ხელისუფლების მუშაობის დამსახურება იყო.

"ამას უნდა მოჰყვეს ავტომატურად დიპლომატიური ურთიერთობების გაწყვეტა სირიასთან და ეს არის შემთხვევა, როცა უნდა მოვიდეს საგარეო საქმეთა მინისტრი პარლამენტში და კომიტეტის სხდომის ფორმატში პასუხები უნდა გასცეს კითხვებს, თუ რა ხდება არაღიარების კუთხით პოლიტიკაში", - განაცხადა სერგი კაპანაძემ.

სირიამ რუსეთისგან ოკუპირებული სამხრეთ ოსეთი და აფხაზეთი დამოუკიდებელ რესპუბლიკებად აღიარა. ამის შესახებ ინფორმაცია სირიის საგარეო საქმეთა სამინსიტროს ვებგვერდზეა გამოქვეყნებული. განცხადებაში წერია, რომ აღიარების მიზეზი სირიის წინააღმდეგ მიმართული ტერორისტული აგრესიაა. უწყების განცხადებით, აღიარება დიპლომატიური ურთიერთობების, საელჩოების დონეზე დამყარდება.

აღიარების შესახებ ინფორმაციას ავრცელებენ სამხრეთ ოსეთის და აფხაზეთის დე-ფაქტო რესპუბლიკებიც.

სამხრეთ ოსეთის და აფხაზეთის დე-ფაქტო რესპუბლიკა უკვე აღიარა რუსეთმა, ნიკარაგუამ, ნაურუმ და ვენესუალამ.