ჩრდილოეთ კორეა ამტკიცებს, რომ ბირთვული იარაღის გამოსაცდელი ერთადერთი პოლიგონი გაანადგურა. მედია წერს, რომ მთელი დღის განმავლობაში რამდენიმე აფეთქების ხმა ისმოდა.

აფეთქებისთვის თვალის სადევნებლად ჩრდილოეთ კორეამ მედიის წარმომადგენლები დაპატიჟა. Sky News-ის ჟურნალისტმა, ტომ ჩეშირმა განაცხადა, რომ ჟურნალისტები მთაზე აიყვანეს და აფეთქებას 500 მეტრიდან აკვირდებოდნენ. ჩრდილოეთ კორეას დამოუკიდებელი ექსპერტები არ მიუწვევია.

12 ივნისს სინგაპურში ჩრდილოეთ კორეისა და აშშ-ს ლიდერების ისტორიული სამიტი უნდა გაიმართოს. დონალდ ტრამპმა განაცხადა, რომ თუ ფხენიანი გარკვეულ პირობებს არ შეასრულებს, შეხვედრა შეიძლება, გადაიდოს.

რამდენიმე დღის წინ აშშ-სა და ჩრდილოეთ კორეის კიდევ ერთი საჯარო დაპირისპირება უსაფრთხოების საკითხებში ტრამპის მრჩევლის, ჯონ ბოლტონის განცხადებას მოჰყვა. ბოლტონმა განაცხადა, რომ ფხენიანის ბირთვული განიარაღება შესაძლოა, "ლიბიის სცენარით" წარიმართოს.

მსგავსმა განცხადებამ ფხენიანი შეაშფოთა. ლიბიის ლიდერი, მუამარ კადაფი 2003 წელს საერთაშორისო შემოწმებას დათანხმდა, რათა დაემტკიცებინა, რომ ბირთვული პროგრამა სრულად დახურა. რვა წლის შემდეგ კი კადაფი მეამბოხეებმა მოკლეს.

რამდენიმე დღის წინ ჩრდილოეთ კორეამსამხრეთ კორეის წარმომადგენლებთან დაგეგმილი მაღალი დონის შეხვედრა გააუქმა.გადაწყვეტილება მას შემდეგ მიიღეს, რაც აშშ-მ და სამხრეთ კორეამ სამხედრო წვრთნები ჩაატარეს.

ჩრდილოეთ კორეის სახელმწიფო მაუწყებელმა განაცხადა, რომ წვრთნები პროვოკაცია და სამხედრო შეჭრისთვის მზადება იყო. აშშ-ს სახელმწიფო დეპარტამენტმა განაცხადა, რომ ისინი კვლავ ემზადებიან სამიტისთვის და არ იციან ჩრდილოეთ კორეის პოზიციის რაიმე ცვლილების შესახებ.