დღეს, 23 მაისის სხდომაზე თბილისის საკრებულოს სახელდებისა და სიმბოლიკის კომისიამ მოიწონა ვარდების მოედნისთვის სახელწოდების შეცვლის ინიციატივა. ამის შესახებ On.ge-ს საკრებულოში უთხრეს.

"ვარდების რევოლუციის მოედნისთვის" "პირველი რესპუბლიკის" სახელის მინიჭების საკითხი საკრებულოს უახლოეს სხდომაზე გავა დასამტკიცებლად, რაც, სავარაუდოდ, პარასკევს გაიმართება. სხდომაზე დეპუტატების კენჭისყრის შედეგად გადაწყდება გადაარქმევენ თუ არა სახელს მოედანს.

"ვარდების მოედნისთვის" სახელის შეცვლის ინიციატივა სახელდების და სიმბოლიკის კომისიის თავმჯდომარემ თინათინ ნიბლოშვილმა წამოაყენა. ინიციატივის განხილვისთვის 20-დღიანი ვადა იყო განსაზღვრული.

თინათინ ნიბლოშვილი ჟურნალისტბთან საუბრისას ამბობდა, რომ "ვარდების რევოლუციის მოედანი" იგივე ნაციონალური მოძრაობის მოედანია.

ინიციატივას მხარი დაუჭირა თბილისის მერმა კახა კალაძემაც. მან ქალაქის მთავრობის სხდომაზე იმედი გამოთქვა, რომ ამ ინიციატივას საზოგადოებაც მხარს დაუჭერს.