პარლამენტის 2016 წლის 20 ივლისის ბიუროს სხდომზე ცნობილი გახდა, რომ პრეზიდენტის მიერ პარლამენტში წარდგენილი უზენაესი სასამართლოს მოსამართლეობის კანდიდატების დამტკიცების საკითხი მოსამზადებლად იურიდიულ საკითხთა და ადამიანის უფლებათა დაცვის კომიტეტებს გადაეცა. დავით უსუფაშვილის თქმით, შემდეგი პლენარული სხდომის ჩატარებამდე, პოლიტიკურმა ჯგუფებმა უნდა განიხილონ აღნიშნული თემა:

"პრეზიდენტი წარადგენს უზენაესი სასამართლოს სამ ვაკანტურ თანამდებობაზე მოსამართლეობის კანდიდატებს. აქედან ორი მათგანი ნონა თოდუა და თამარ ლალიაშვილი ხელახლაა, ხოლო ლევან ბოძაშვილი პირველადაა წარმოდგენილი ამ თანამდებობაზე. ამ საკითხში ჩვენს გვაქვს რეგლამენტიც და პრაქტიკაც. პოლიტიკურ ჯგუფებს შეუძლიათ შეხვდნენ და განიხილონ, ვისაც ექნება სურვილი, იმიტომ რომ ორი კანდიდატი იგივეა, რაც მანამდე იყო და ეს პოლიტიკური ჯგუფების გადასაწყვეტია".

რაც შეეხება ვადებს, უსუფაშვილის თქმით, როდესაც პლენარული სხდომები გაიმართება,ანუ სექტემბრის დასაწყისისთვის სასურველია რომ იმ დროისთვის უკვე მზად იყოს საკითხი გადაწყვეტილების მისაღებად.

პარლამენტმა ერთხელ უკვე დაიწუნა პრეზიდენტის მიერ წარდგენილი კანდიდატები, მაშინ ნონა თოდუასა და თამარ ლალიაშვილთან ერთად ანა დოლიძეც იყო წარდგენილი, რომელიც ამჟამად პრეზიდენტის საპარლამენტო მდივანია.