საქართველოს პარლამენტის ადამიანის უფლებათა კომიტეტის თავმჯდომარის, სოფიო კილაძის თქმით, "ოჯახის სიწმინდე მომავალ თაობებს უნდა გადავცეთ". ამის შესახებ სოფო კილაძემ დღეს, 17 მაისს ჰომოფობიასთან და ტრანსფობიასთან ბრძოლის საერთაშორისო დღეს განაცხადა.

დეპუტატი ამბობს, რომ საქართველო ისტორიულად ევროპული ოჯახის ნაწილია დამოწყვლადი ჯგუფების დაცვა სახელმწიფოს მხრიდან განსაკუთრებულ საჭიროებაა.

სოფიო კილაძის აზრით, დემოკრატიული სახელმწიფოსათვის ფუნდამენტური მნიშვნელობის არის უმცირესობათა უფლებების დაცვა.

"შესაბამისად, დემოკრატიულ საზოგადოებაში ჰომოფობიისა და ტრანსფობიისთვის ადგილი არ რჩება", - აცხადებს სოფიო კილაძე.

დეპუტატის თქმით, იმავდროულად, ოჯახის სიწმინდის დაცვა ჩვენი ქვეყნის დიდი ნაწილისთვის უმნიშვნელოვანესია.

"ის ჩვენი საზოგადოების უმეტესობისთვის ტრადიციაა, რომელსაც გაფრთხილება და მომავალი თაობებისთვის გადაცემა სჭირდება", - ფიქრობს დეპუტატი.

სოფო კილაძის თქმით, მიუხედავად საზოგადოების სხვადასხვა ჯგუფებს შორის არსებული განსხვავებებისა, დაუშვებელია ეს გახდეს ქვეყანაში დაპირისპირების და ძალადობის საფუძველი.

"ყველა ადამიანს აქვს საკუთარი აზრის გამოხატვის, ასევე, მშვიდობიანი შეკრების უფლება და მისი უზრუნველყოფა სახელმწიფოს ვალდებულებაა. მიუღებელია აზრის გამოხატვის გამო ერთმანეთისთვის შეურაცხყოფის მიყენება", - ნათქვამია სოფიო კილაძის განცხადებაში, რომელიც საქართველოს პარლამენტის პრესსამსახურმა გაავრცელა.

30 აპრილს, ცნობილი გახდა, რომ ადამიანის უფლებათა კომიტეტი 17 მაისს არ აღნიშნავს.

"ჩვენი ნებაა, გვინდა, აღვნიშნავთ, გვინდა - არა", - განუცხადა დეპუტატმა ლიბერალის ჟურნალისტს.

ამ განცხადების შემდეგ საქართველოს პარლამენტთან სოფიო კილაძის გადადგომის მოთხოვნით თანასწორობის მოძრაობამ აქცია გამართა.

პარალელურად, პარლამენტთან მიმდინარეობდა კონტრაქცია, რომელიც ჰომოფობიური და ქსენოფობიური განცხადებებით გამოირჩეოდა. ერთ-ერთმა მონაწილე გურამ ფალავანდიშვილმა თანასწორობის მოძრაობის წევრებს კვერცხი ესროლა. პოლიციამ სამი პირი ხულიგნობის მუხლით დააკავა.

ამავე დღეს, თანასწორობის მოძრაობის აქტივისტები პარლამენტში შევიდნენ და ადამიანის უფლებათა კომიტეტის სხდომაზე სოფიო კილაძის გადადგომა ისევ მოითხოვეს.

ადამიანის უფლებათა კომიტეტის თავმჯდომარემ, სოფო კილაძემ განაცხადა, რომ მას 17 მაისის აღნიშვნასთან დაკავშირებით ჰომოფობიური განცხადება არ გაუვრცელებია.

მისი თქმით, ყველა ადამიანს აქვს უფლება ჰქონდეს აზრი და გამოხატოს საკუთარი აზრი და ყველა ადამიანი დაცულია კანონით და კონსტიტუციით.